Ơi Y Dẫn Êban (djuai ania Êđê) jing mơnuih ping gah jơnum ƀơi grup ping gah plơi Đoàn Thành 2, să Hoà Đông, tơring glông Krông Pač, Dak Lăk. Tê̆t phrâo rơgao, sang anŏ hok mơ-ak biă yua gơnam pơhrui glăi lu, hơmâo nua đĭ, biă ñu hơmâo mă prăk 3,4 klai mơ̆ng prăk čuk pơkra Jơlan rơdêh đuăi hmar Khánh Hoà - Buôn Ma Thuột. Mơ̆ng mrô prăk anai, ñu mă giăm 500 klăk blơi rơdêh ôtô, rơbêh 2,9 klai prăk blơi 2 ha đang kơphê pla plah sầu riêng. Bruă blơi rơdêh hăng tuh pơ alin ngă đang hơmâo pơmin tong ten laih lơ̆m thâo lŏn hăng phun kyâo hơmâo mă pioh man pơkra jơlan. Mơnuih ping gah Y Dẫn lăi:

“Sang anŏ gơmơi hơmâo abih tih ñu 8,4 sao lŏn kơphê, sầu riêng, tiu hăng boh troh, pơhrui rim thun 300 klăk. Lơ̆m hơmâo tơlơi pơtrun amăng thun 2021, yua kâo lĕ mơnuih ping gah, sang anŏ gơmơi hai lêng kơ mơnuih ping gah mơn anun jing tŭ ư bruă pơkra jơlan mơ̆ng Kơnuk kơna, gơmơi jŭ yap glăi laih anun hơmâo kơnuk kơna duh prăk čang rơmang tơdơi anai lơ̆m hơmâo jơlan lĕ bruă nao rai amuñ, mơ-ak hloh amăng bruă sĭ mơdrô”.

Sang anŏ mơnuih ping gah Y Ngắt Niê ƀơi să Ea Yông, tơring glông Krông Pač ăt hơmâo rơbêh 500m2 lŏn hăng rơbêh 70 phun kơphê amăng anih čuk pơkra jơlan rơdêh đuăi hmar Khánh Hoà - Buôn Ma Thuột. Ñu brơi thâo, mơ̆ng mrô lŏn hăng mrô phun pla anai, sang anŏ ñu hơmâo mă rơbêh 120 klăk prăk duh lŏn. Abih bang mrô prăk hơmâo mă yua pơkra gơnam, tơjŭ pla, pơkra glăi pơbung sang. Sang anŏ ñu ăt jing sa amăng hơdôm boh sang anŏ nao hlâo ƀơi să Ea Yông ngă tui tơlơi pơtrun jŭ yap, pơkă lŏn tơnah hăng tŭ ư prăk duh lŏn, tañ jao lŏn pioh pơkra jơlan. Mơnuih ping gah Y Ngắt lăi:

“Hơmâo jơlan hơdră iâu pơthưr jao lŏn pioh pơkra jơlan rơdêh đuăi hmar Khánh Hòa - Buôn Ma Thuột lĕ sang anŏ gơmơi ăt tŭ ư mơn, tŭ ư mă prăk duh lŏn. Yua ta lĕ mơnuih ping gah anun ăt pơtrut tui pran jua nao hlâo, nao hlâo kiăng neh met wa lăng tui hăng ngă tui kiăng hơmâo jơlan hiam, nao rai amuñ ƀiă. Laih anun kâo ăt iâu pơthưr ană plơi hơmâo lŏn pioh pơkra jơlan lĕ ta tŭ ư mă prăk duh ba laih anun jao lŏn brơi kơ kơnuk kơna mơ-ak mơ-ai đah mơ̆ng tañ pơkra jơlan”.

Kơčăo bruă jơlan rơdêh đuăi hmar Khánh Hoà - Buôn Ma Thuột, rơwang blung a găn nao tơring glông Krông Pač glông 33,3 km, đơ đam lŏn čuk pơkra jơlan rơbêh 255ha. Rơbêh 2.000 boh sang anŏ amăng 8 boh să hơmâo lŏn mă pơhrui pơkra jơlan. Jơnum min mơnuih ƀon sang tơring glông hơmâo 9 wơ̆t duh prăk, mrô prăk rơbêh 344 klai. Abih bang lŏn pơhrui pioh pơkra jơlan ƀơi tơring glông hơmâo jao kơ hơdôm anom bruă pơkra jơlan laih.

Tui hăng ơi Phạm Văn Hà - Kơ-iăng khua Jơnum min mơnuih ƀôn sang să Hòa Đông, lŏn tơnah ƀơi tơring glông Krông Pač lăi hrŏm hăng să Hòa Đông lăi hơjăn lêng kơ lŏn mriah bazan soh, lăp biă hăng bruă pla kơphê, tiu, biă ñu sầu riêng. Rim ha lŏn hơmâo pơhrui glăi mơ̆ng 800 truh 1,2 klai prăk/thun. Mah hơmâo prăk biă, samơ̆ lơ̆m hơmâo tơlơi pơtrun mă pơhrui lŏn pioh pơkra jơlan, mơnuih ƀôn sang tŭ ư, nao hlâo amăng bruă anai lĕ mơnuih ping gah, amăng anun hơmâo lu mơnuih ping gah lĕ mơnuih djuai ƀiă pơ să.

“Amăng mrô 152 boh sang anŏ ƀơi să Hòa Đông hơmâo lŏn pơkra jơlan rơdêh đuăi hmar, jing hơmâo ha mơkrah amăng mrô anun lĕ mơnuih djuai ƀiă, hơmâo lu mơnuih jing khua, mơnuih ping gah. Lăng nao abih bang hơdôm boh sang anŏ hơmâo mơnuih ngă khua, mơnuih ping gah lêng kơ nao hlâo jao lŏn pioh pơkra jơlan. Pơhmutu kah hăng sang anŏ ơi Y Dẫn, sang anŏ hơmâo lŏn prong giăm 1 ha lŏn pioh čuk pơkra, ñu gir jŭ yap, pơkă lŏn, mă prăk. Ƀing mơnuih ping gah pơkŏn hai hnun mơn”.

Hăng tơlơi pơmin “mơnuih ping gah nao hlâo ană plơi kiăo tlôn” mơ̆ng mơnuih ping gah ƀơi să Hòa Đông hăng Ea Yông tơring glông Krông Pač, tơring čar Dak Lăk, bruă jao lŏn pơkra jơlan rơdêh đuăi hmar Khánh Hoà - Buôn Ma Thuột hơmâo ngă tañ hloh pơhmu hăng tơring glông pơkŏn ƀơi Dak Lăk.