Thôn 4, să Phước Cát 2 ataih mơ̆ng tơring glông Cát Tiên 40km, hăng giăm 50 boh sang anŏ, 160 čô mơnuih, lêng kơ mơnuih djuai ƀiă. Jing sa čô mơnuih amăng plơi, mơnuih ping gah Điểu K’Điệp pơmin biă mă kơ tơlơi tơnap tap amăng hơdip mơda, ngă bruă mơ̆ng neh met wa. Mơ̆ng thun 2016, lơ̆m nao ngă Khua jơnum min djŏp djuai ania mơnuih mơnam thôn 4, ñu ngă klă bruă pơtruh nao rai kơplah wah Ping gah, gong gai hăng mơnuih ƀôn sang, anăp nao akŏ pơjing tơlơi hơdip hiam hloh.

Rơđah biă ñu, ayong Điểu K’Điệp hrŏm hăng ƀing apăn bruă plơi pơphun pơtô pơblang, iâu pơthưr ană plơi, nao pơ rim boh sang lăi pơthâo jơlan hơdră mơ̆ng Ping gah, tơlơi phiăn mơ̆ng Kơnuk kơna kiăng mơnuih ƀôn sang thâo rơđah hăng ngă tui. Laih dong, thâo tơlơi kiăng khăp mơ̆ng neh met wa kiăng lăi pơhmư̆ tañ hăng ping gah, gong gai să. Ayong Điểu K’Điệp brơi thâo, kiăng mơnuih ƀôn sang đăo gơnang hăng ngă tui lĕ pô ñu khŏm ngă hlâo.

“Ta pơtô brơi neh met wa bơwih ƀong, pơplih phun pla hlô rông. Kah hăng phun boh ñông, tơdah phun tha lĕ ta khŏm pla phun phrâo, samơ̆ ƀu djơ̆ pơplih abih tih ôh. Tơdah pla 1 ha lĕ ta pơplih 1 sao đôč, yua dah pơplih abih mă hơget mơ̆ng ƀong. Ngă hmua pơdai tui anun mơn, pơtô brơi neh met wa lăng hlăt, kman samơ̆ ngă hmua khŏm ngă dưm kơnar. Bơ bruă ƀă ană lĕ ta khŏm pơtô kiăng ƀă ană aset, tơkeng 1, 2 čô đôč, hơdư̆ ƀiă tơkeng ană tak 3”.

 Mơnuih ƀôn sang să Phước Cát 2 mă lŏn pla phun ƀu hơmâo ƀong hơdai pla sầu riêng

Pơplih tơlơi pơmin mơ̆ng bruă anet, tơlơi hơdip mơnuih ƀôn sang djuai ƀiă ƀơi thôn 4, să Phước Cát 2 pơplih lu laih, lui hĭ tơlơi phiăn ƀu hiam. Ră anai rim boh sang anŏ lêng kơ gir bơwih ƀong, mă yua boh thâo amăng bruă ngă hmua. Plơi pla jai hrơi pơplih klă tui mơn. Hơdôm glông jơlan nao rai agaih, sang anŏ hiam, agaih, war rơmô kơbao huăi hơƀak dong tah....

Tơlơi bơwih ƀong hơđong, neh met wa rŭ glăi, djă lui hơdôm gru grua boh thâo hiam mơ̆ng djuai ania gơñu. Hơdôm grup atông čing, ayun suang, grup đah rơkơi đă boh lông, pah boh lông đah kơmơi đah rơkơi mơ̆ng thôn 4 lêng gum djru hăng hơmâo mă lu pri amăng hrơi pơplông yua să, tơring glông pơphun. Ayong Điểu K’Điệp ră ruai:

“Neh met wa pơ anai hơmâo grup atông čing, grup suang hơmâo mơn; mơñam bung bai rêu rô, dŏ hơmâo lu mơnuih thâo mơñam. Gơmơi pơtô brơi neh met wa anăm lui ôh tơlơi phiăn hiam, khŏm djă lui. Gru grua boh thâo mơ̆ng ơi yă ta, ta khŏm djă yơh”.

Tui hăng ơi Đường Bình Bộ, Khua Jơnum min djŏp djuai ania mơnuih mơnam Việt Nam să Phước Cát 2, thôn 4 jing kual ataih, asuek, jơlan nao rai tơnap, tơlơi hơdip bơwih ƀong huă tơnap biă mă. Ră anai plơi pơđĭ kyar hơđong amăng djŏp bruă laih, biă ñu man pơdong plơi pla phrâo hăng pơhrŏ trun mrô sang anŏ rin hơđong kơjăp. Mơnuih ƀôn sang thâo pơmin hrưn đĭ akŏ pơjing tơlơi hơdip trơi pơđao. Dưi ngă tui anai lĕ hơmâo tơlơi gum djru prong mơ̆ng mơnuih ping gah hlăk ai Điểu K’Điệp, Khua jơnum min djŏp djuai ania mơnuih mơnam thôn 4:

“Pơtô pơblang, iâu pơthưr neh met wa ngă tui hơdôm jơlan hơdră ngă bruă mơ̆ng kơnuk kơna klă biă. Kơ bruă pơđĭ kyar bơwih ƀong lĕ amăng hơdôm thun rơgao, neh met wa thôn 4 gir ngă hmua pla pơjing, tơlơi hơdip đĭ tui mơn, bruă wai lăng ba djuai ania ăt hơmâo ngă klă. Amăng hơdôm thun laih rơgao, sit ayong Điểu K’Điệp yơh pô gir iâu pơthưr mơnuih ƀôn sang ngă klă bruă kơnuk kơna pơtrun, man pơdong plơi pla phrâo hrŏm hăng bruă yua să, tơring glông pơphun”.

Hăng hơdôm tơlơi gum djru akŏ pơdong plơi pla phrâo, Điểu K’Điệp hơmâo Jơnum min djŏp djuai ania mơnuih mơnam Việt Nam tơring čar Lâm Đồng bơni hăng brơi hră bơni jing Khua wai lăng djŏp djuai ania mơnuih mơnam kual mơnuih ƀôn sang djuai ƀiă mă bruă rơgơi thun 2016-2021./.