- Ơ ơi, hrơi jar kmar mơnuih tha rơma thun anai (1/10) ăt lĕ hrơi pơphun blan ngă bruă yua kơ mơnuih tha rơma. Rơkâo ih brơi thâo, tơlơi yôm kah hăng hơdôm bruă mă phun amăng blan ngă bruă anai ?

Ơi Nguyễn Thanh Bình: Thun anai ƀing gơmơi pơphun bruă mă amăng đơ đam dêh čar ƀơi tơring čar Hải Dương. Pơphun blan ngă bruă samơ̆ ăt tŏ tui pơsur ƀing mơnuih tha rơma gum tơngan hrŏm, pơgôp ngă tui hơdôm tal pơtrut pơsur ngă bruă ba glăi boh tŭ yua hloh. Amăng hrơi blan pok pơhai ngă tui, ƀing gơmơi pơphun hyu pơtô pơblang dơlăm ƀiă dong kơ tơlơi yôm, anăn pơphun blan ngă bruă yua kơ mơnuih tha rơma Việt Nam thun 2024. Mơng anun, pơtrut pran ngă tui, laih dong tơlơi mut hrŏm git gai mơng gưl Ping gah, gong gai ƀon lan, jơnum djop djuai ania mơnuih mơnam, mơng anun ăt hơmâo tơlơi gum hrŏm kjăp phik mơng hơdôm khul grup, anih anom, kiăng pok pơhai blan ngă bruă ba glăi tŭ yua hloh, ngă lar hyu amăng djop gưl kah hăng amăng abih bang mơnuih. Mơng anun kiăng pơ alum, pơtrut pơsur, djru brơi mơnuih tha rơma dŏ tơnap tap amăng hơdôm boh ƀon lan amăng đơ đam dêh čar.

- Amăng hrơi blan rơgao, Ping gah, kơnuk kơna lêng kơ đing nao mơnuih tha rơma, tơlơi anai hơmâo pơdah rơđah mơng bruă Khul apăn bruă Ping gah hơmâo tơlơi klah čun mrô 58 kơ bruă mă mơng mơnuih tha rơma. Anai lĕ tơlơi kơđŏm glăi yôm amăng bruă pơphun, pơplih bruă mă mơng khul mơnuih tha rơma, kiăng mơnuih tha rơma tŏ tui gum pơgôp tơlơi găn rơgao amăng bruă hrŏm kơ dêh čar. Yua anun ih dưi lăi pơthâo rơđah dong mơn kơ tơlơi anai ?

Ơi Nguyễn Thanh Bình: Lơm hơmâo tơlơi pơtrun mrô 58 hăng hơmâo tơlơi đing nao mơng gong gah djop gưl, ƀing gơmơi hơmâo git gai, gum hrŏm kjăp hăng hơdôm anom bruă gơnong glông pok pơhai ha amăng plĕ, pơhlôm mut hrŏm abih bang bruă mă mơng gơnong glông truh pơ ƀon lan. Lơm pok pơhai, ngă hơdơ̆ ƀơ̆i brơi kơ giong hơdơ̆ anun kiăng pơplih hơbô̆ bruă ƀơi 5 boh tơring čar, ƀôn prong yua anun hơmâo 50 boh tơring čar, ƀôn prong mơng khul kah pha 4 gưl phun mơng bruă mă mơng khul hơmâo hrưn đĭ. Ngă klă bruă bơwih brơi tơlơi suaih pral hăng tŏ tui tơlơi gơgrong mơng mơnuih tha rơma, kiăng ƀing tha rơma tŏ tui mut hrŏm, pơgôp tơlơi thâo thăi amăng pơđĭ kyar lŏn ia.

- Ơ ơi, hơmâo thâo amăng hơdôm hrơi thel mrô 3 rơgao hrŏm hăng mơnuih ƀôn sang đơ đam dêh čar, Khul mơnuih tha rơma Việt Nam ăt hơmâo gum pơgôp kiăng kơ djru brơi neh met wa glăk bưp tơnap tap, sit biă ñu hăng ƀing mơnuih tha rơma, sang anŏ tơnap tap, rơngiă djop mơta yua hơjan kơthel ngă. Ih dưi lăi pơthâo rơđah dong mơn kơ bruă djru brơi mơnuih tha rơma ?

Ơi Nguyễn Thanh Bình: Ngă tui tơlơi git gai mơng Khua git gai Ping gah, Khua mir sir ơi Tô Lâm; ngă tui tơlơi iâu pơthưr mơng Jơnum min djop djuai ania mơnuih mơnam Việt Nam, pơtrut pơsur abih bang mơnuih djru brơi hơdôm boh tơring čar bơdjơ̆ nao mơng kơthel mrô 3, ƀing gơmơi hơmâo hmao tlôn hơmâo hră pơ-ar hăng pok pơhai git gai truh djop gưl mơng gơnong glông truh pơ plơi pla. Rĭm čô mơnuih tha rơma kiăng gơgrong gum pơgôp, laih dong pơtrut pơsur ană tơčô, ding kơna khul mơnuih tha rơma đơ đam dêh čar gum pơgôp, djru brơi mơnuih ƀôn sang ƀơi hơdôm boh tơring čar glăk răm rai yua kơthel mrô 3 ngă.

- Hai, bơni kơ ih hŏ!