Mơguah lơ 16/10, Grup khua mua pơ ala mơnuih ƀôn sang dêh čar tơring čar Kon tum pơphun jơnum bưp mơnuih ƀôn sang ruah khua jing ƀing apăn bruă mut phung, mơnuih tơpuôl, mơnuih mă bruă apah hlâo kơ nao jơnum lok 8, khua mua pơ ala mơnuih ƀôn sang dêh čar tal XV kiăng čih pioh hơdôm tơlơi rơkâo đĭ, pơdah thâo, pơgôp hiăp kơ 3 kơčăo bruă tơlơi phiăn čih pơkra pơhrua glăi, hơmâo pơdjơ̆ nao jĕ giăm hăng tơlơi dưi, anŏ tŭ yua kơ mơnuih mă bruă apah ƀong prăk blan. Hăng tơlơi phiăn Luật Công đoàn, tơlơi phiăn mơnuih tơpuôl ƀudah mơnuih mut phung čih pơkra pơhrua glăi grup khua mua pơ ala ƀơi Kon Tum tŭ mă 6 mơta tơlơi pơgôp hiăp, rơkâo đĭ mơ̆ng mơnuih tơpuôl; tơlơi phiăn Luật việc làm, tơlơi phiăn Bruă mă čih pơkra pơhrua glăi hăng tơlơi phiăn Luật Bảo hiểm y tế tơlơi phiăn pơhlôm nua ia jrao hơmâo tŭ mă 5 mơta tơlơi rơkâo, brơi pơblih pơhrua glăi.

Boh yôm phun rơkâo, pơgôp hiăp mơ̆ng mơnuih mă bruă apah,  mut phung jing mơnuih tơpuôl ƀơi tơring čar Kon Tum kiăng lĕ, lăng mơ̆ng bruă mă rim hrơi, anŏ pơdjơ̆ nao kơ rim čô mơnuih mă bruă, tơlơi dŏ dong ƀong huă, hrăm hră pơar jơlan hơdră, tơlơi djru laih anun anŏ čang rơmang tơlơi phiăn pơkă khom jĕ giăm hăng tơlơi hơdip mơda hloh. Bơ ră ruai hăng ƀing ruah khua jing mơnuihtơpuôl, mơnuih mă bruă apah ƀong prăk blan, ơi Phạm Đình Thanh, Kơ-iăng Khua grup pơ ala mơnuih ƀôn sang dêh čar ƀơi tơring čar Kon Tum čih pioh, lăi lĕ, hơdôm tơlơi rơkâo đĭ, djru pơgôp hiăp mơ̆ng mơnuih tơpuôl hăng mơnuih mă bruă apah ƀong prăk lăp soh yơh.