Amăng 2 wot nao čuă, mă bruă ƀơi tơring čar Kon Tum amăng thun 2011 hăng thun 2017, Khua git gai Ping gah Nguyễn Phú Trọng leng kơ pioh mông nao čuă, hơduah ĕp lăng bôh nik tơlơi hơdip mơda, hmư̆ lăng tơlơi pơmin, tơlơi čang rơmang mơ̆ng neh wa djop djuai ania ƀiă. Kơnuih lăng ƀu kơdrưh, samơ̆ jê̆ giăm, hơdôm tơlơi tơña bla, pơtă pơtăn mut dơlăm amăng pran jua mơnuih ƀôn sang mơ̆ng Khua git gai Ping gah ăt dưi hmâo na nao mơn mơnuih ƀôn sang Kon Tum djă pioh. Ơi A Bát, ƀơi plơi Kon Rơbang 2, să Vinh Quang, plơi prong Kon Tum, ol kơdol pran jua:

“Thun 2017 ană plơi ƀơi anăp bưp Wa Nguyễn Phú Trọng ƀơi anai, tha plơi jao kơ Wa sa blah ao mơñăm mơ̆ng neh wa ƀơi plơi. Wa Nguyễn Phú Trọng tơña bla neh wa, Ñu mă tơngan rim čô mơnuih, pơtă pơtăn neh wa gir run bơwih ƀong huă, anăm hmư̆ tui ƀing sat plư. Hmư̆ tui tơlơi pơtă pơtăn mơ̆ng wa Nguyễn Phú Trọng lĕ mơnuih ƀôn sang plơi Kon Rơbang gum hrŏm hơbit, jum ba tơdruă ră anai plơi gơmơi pơđĭ kyar pơplih phrâo lu laih. Lơm hmư̆ jing Wa rơngiă ƀing gơmơi rơngôt biă, hlơi hlơi leng kơ hning rơngôt, či ƀlĕ ia mơta”.

Ñu lĕ mơnuih arăng đăo gơnang mơng djuai ania Êđê hơmâo lu wŏt nao jơnum pơƀut hơdôm bruă tui gru grua ƀơi plơi prong jưh jom Hà Nội, mơnuih kơhnâo kơhnăk Ama H’Loan, dŏ amăng ƀuôn Akŏ Dhông, phường Tân Lợi, plơi prong Buôn Ma Thuột, tơring čar Dak Lak brơi thâo, Khua git gai Ping gah dêh čar ơi Nguyễn Phú Trọng lĕ khua mua pơprong hơdip jê̆ giăm biă mă, đing tơngia hmư̆ mơnuih ƀôn sang. Yua mơng hơdôm hơdră bruă lăp djơ̆ mơng gơnong glông hăng tơlơi git gai mơng Khua git gai Ping gah dêh čar, kual cư̆ siăng kriang pơtâo, kual giăm guai, kual mơnuih djuai ania ƀiă hơmâo pơplih, pơđĭ kyar ƀiă dong. Tha plơi Ama H’Loan brơi thâo:

“Mơng tơlơi hning rơngŏt anai amra pơtrut ƀing ta găn rơgao tơnap tap ngă tui tơlơi git gai mơng Ping gah, mơng Kơnuk kơna, amăng anun hơmâo tơlơi črâo ba mơng Khua git gai Ping gah dêh čar ơi Nguyễn Phú Trọng. Kâo pô lơm dŏ hơdip, kâo kiăng pơtă pơtăn ană tơčô gir run pơjing kual Dap kơdư ta hrưn đĭ pơdrong asah, pơgôp pơjing plơi pla lŏn ia hiam klă ƀiă dong”.

Hmư̆ hing Khua git gai Ping gah Nguyễn Phú Trọng rơngiă, neh wa djop djuai ania ƀơi să Quảng Tâm, tơring glông Tuy Đức, tơring čar Dak Nông hning rơngôt biă. Hơdor tơlơi Khua git gai Ping gah pơtă pơtăn, pơsur mơnuih ƀôn sang amăng tal nao čuă Quảng Tâm mơ̆ng 12 thun hlâo adih, neh wa djop plơi pla gum hrŏm hơbit, ha pran jua, đăo kơnang amăng tơlơi git gai mơ̆ng Ping gah, Kơnuk kơna, gum pran hrŏm pơdŏng plơi pla jai hrơi jai klă hiam pơdrong asah. Ayong Điểu Ngót, djuai ania Bơnông, Khua git gai Khul hlăk ai Cộng sản rơnuk Hồ Chí Minh să Quảng Tâm, tơring glông Tuy Đức, tơring čar Dak Nông, lăi pơthâo:

“Hmư̆ hing Khua git gai Ping gah dêh čar rơngiă, rơnuk hlăk ai amăng să hning rơngôt biă sa čô khua git gai rơgơi mơbruă, pran gơgrong kơjăp, abih pran jua yua kơ lŏn ia yua kơ mơnuih ƀôn sang, Ñu pioh na nao pran jua kiăng khăp phara kơ rơnuk hlăk ai hăng kual ataih, asuek. Ƀing gơmơi, hlăk ai djă pioh na nao tơlơi Khua git gai Ping gah pơtă pơtăn, khom ngă tui pran jua gum hrŏm hơbit, ha pran jua, đăo kơnang kơ tơlơi git gai mơ̆ng Ping gah, Kơnuk kơna. Ƀing gơmơi amra gir run hrăm tui, bơwih ƀong huă, pơđĭ kyar bơwih ƀong, run pran pơdŏng plơi pla, lŏn ia jai hrơi pơdrŏng asah klă hiam”.