VOV4.Jarai - Lơ 14/8, Pô truh pơhiăp mơng Ding jum pơtom hiăp dêh čar Nga Maria Zakharova brơi thâo, gah dêh čar Nga amra bơkơtuai tơpă sit hăng Mi kơ bruă pơjao nao rai ƀing mơnă. Pơhiăp hăng ƀing hyu mă tơlơi pơhing phrâo lơ̆m lăi nao bruă pô apăn bruă bơwih ƀong Viktor Bout, glăk hơmâo arăng mă krư̆ 25 thun ƀơi dêh čar Mi, hăng tơlơi soh sĭ mơdrô phao kơtuang, pô truh pơhiăp ding jum pơtom hiăp Nga pơsit, dêh čar anai amra bơkơtuai kiăng ĕp jơlan pơjao nao rai mơnă. Hlâo kơ anun, dêh čar Mi kiăng Nga pok tơbiă Viktor Bout, song glăi Brittney Griner, hơmâo arăng ngă kơđi ƀơi dêh čar Nga yua sĭ mơdrô ma túy, hăng Paul Whelan, pô arăng mă krư̆ yua hyu sŭ hluă. Phrâo anai, amăng mông pơhiăp telephôn kơplah wah Khua ding jum pơtom hiăp Nga ơi Sergei Lavrov hăng Khua ding jum pơtom hiăp Mi Antony Blinken, dua bơnah lăi nao hăng tŭ ư hrŏm hơdră pơtom hiăp lăp djơ̆ pioh pơsir bruă anai.

Siu H’ Mai: Pơblang