Rơbêh kơ 3 blan anai, rĭm mơmŏt mơng hrơi sa truh pơ hrơi rơma rĭm wŏt hrơi tơjuh, anih pơtô hrăm ƀơi sang hră gưl I Trần Phú (să Ia Dom, tơring glông Đức Cơ) rơđah bang hăng hmư̆ ƀơƀruk amăng pơđok hră. Anih pơtô hơmâo giăm 40 čô mơnuih, anai lĕ mơnuih djuai ania ƀiă mơng hơdôm boh plơi pla ƀơi să Ia Dom, tơring glông giăm guai Đức Cơ, tơring čar Gia Lai.

Ƀơi anih pơtô hrăm, yă Siu H’Phem (dŏ amăng plơi Mok Đen 2, să Ia Dom, tơring glông Đức Cơ) 54 thun, mơnuih kiăo tui hrăm tha rơma hloh, glăk dŏ čih. Ñu brơi thâo, yua tha rơma laih, kiăo tui hrăm ăt tơnap mơn samơ̆ ñu ăt gir run, ră anai thâo pơđok, thâo čih ană ñu pô yơh:

“Ră anai kâo glăk gir run kiăo tui hrăm hăng hơnong pơkă blung a lĕ kiăng thâo čih, thâo pơđok, sit biă ñu lĕ thâo čih anăn pô hăng ƀing mơnuih jum dar dong, yua anun kâo gir run biă mă. Kâo kiăo tui hrăm ƀu djơ̆ kiăng kâo pô thâo hrăm đôč ôh mơ̆ ăt kiăng dưi pơtô glăi ană tơčô dong”.

Glăk dŏ ƀă ană 5 blan ƀơi rŏng, amai Rmah H’Với (dŏ amăng plơi Mok Đen 1, să Ia Dom) glăk hmư̆ nai pơtô. H’Với brơi thâo: ñu 26 thun, hơmâo 3 čô ană laih, tơlơi hơdip sang anŏ tơnap tap. Anih pơtô hrăm anai lĕ anih kiăng ñu hrưn đĭ, yua anun H’Với gir run kiăo tui hrăm amăng mơmŏt mah anih hrăm ataih giăm 10 km.

“Kâo kiăo tui hrăm hăng tơlơi čang rơmang thâo hră kiăng dưi pơtô brơi ană bă, laih dong lơm nao ngă hră pơ-ar thâo kĭ anăn pô dong. Sang anŏ tơnap tap biă mă yua anun lui sang hră, ră anai hơmâo tơlơi đing nao mơng gong gai ƀon lan pok anih pơtô hrăm anun kâo gir run kiăo tui hrăm kiăng thâo boh hră, kiăng amuñ ƀiă lơm nao ngă hră pơ-ar”.

Nai Trương Thị Cúc, nai pơtô ƀơi sang hră gưl I Trần Phú brơi thâo : Abih bang mơnuih kiăo tui hrăm lêng ƀing pơprong soh, anai lĕ mơnuih djuai ania ƀiă, ƀing gơñu rĭm hrơi ngă đang hmua. Ƀing nai pơtô kiăng črâo brơi tong ten, gir run amăng bruă pơtô hrăm kiăng ƀing kiăo tui hrăm tañ thâo hră, thâo pơđok, thâo čih.

“Kâo hok mơ-ak biă mă yua ƀing kiăo tui hrăm lêng hur har pran jua, ƀing  gơñu gir run biă mă, ƀing gơñu kiăng thâo lu anih hiam amăng dêh čar Việt Nam lơm nai pơtô ƀing gơñu đing tơngia hmư̆. Kâo lăng ƀing gơñu pap biă mă, anai lĕ ƀing ƀun rin, sang anŏ tơnap tap yua anun kiăng thâo hrăm. Bruă pơtô hrăm kiăng pơčlah phara, ƀing nai pơtô ăt glêh glar mơn pơhmu hăng bruă pơtô tui tơđar”.

Samơ̆, tui nai Phan Thị Tâm, mơnuih sui thun pơtô brơi ƀing aka ƀu thâo hră, rơwang blung a djru brơi neh met wa thâo pơđok, thâo čih ăt amuñ mơn, samơ̆ tơdơi anun mrô mơnuih kiăo tui hrăm aset tui yua bơdjơ̆ nao lu tơlơi. Ƀing nai pơtô khŏm nao tơl sang kiăng pơanur nao hrăm hră:

“Yak nao rơwang tal 2 ƀing kiăo tui hrăm dưi pơđok, thâo čih, ƀing gơñu pơmĭn hrăm dơ̆ anun dưi yơh anun nao pơ hmua, đa hơmâo ƀing hlăk ai nao mă bruă pơ Bình Dương yua anun mrô mơnuih kiăo tui hrăm aset tui. Bruă pơtrut pơsur ăt bưp lu tơnap tap yua ƀing gơñu glăi mơng hmua mơmŏt soh, đa hơmâo mơnuih tơnap tap biă mă, ƀu hơmâo prăk blơi ia săng kiăng kơ nao hrăm. Ƀing nai nao pơanur djru brơi prăk pơkra rơdêh, nao pơgiăng, ngă djop mơta kiăng ƀing gơñu kiăo tui hrăm”.

Ngă tui jơlan hơdră pơtô brơi ƀing aka ƀu thâo hră rơwang thun 2021-2025, tơring glông giăm guai Đức Cơ hơmâo pok 20 anih pơtô hrăm brơi rơbêh 600 čô mơnuih. Đức Cơ hơmâo pơjing khul git gai pơtô brơi ƀing aka thâo hră amăng hơdôm boh plơi pla, jao bruă brơi ƀing ding kơna tui rĭm boh ƀon lan phara; kiăo tui lăng, pel ĕp, djru brơi hơdôm boh plơi pla tơnap tap. Ơi Siu Luynh, Kơ-iăng khua Jơnum min mơnuih ƀôn sang tơring glông Đức Cơ brơi thâo:

“Lơm neh met wai thâo pơđok, thâo čih, bruă pơtô pơblang brơi neh met wa amuñ ƀiă, wŏt bruă pơhlôm brơi tơlơi dưi sit nik mơng ƀing gơñu dong. Mơng hơduah ĕp brơi ƀuh neh met wa mah tha rơma lơm thâo pơđok, thâo čih ƀing ñu hok mơ-ak mơn, abih bang kiăo tui hrăm hơmâo amĭ ama, ơi yă. Gah Gong gai ƀon lan ƀing gơmơi amuñ tơdah kiăng tơña blan hơget thơ, hơdôm akŏ bruă ba glăi pơ plơi pla, brơi neh met wa soh”.

Rơđah bơngač apui kơđen amăng anih pơtô hrăm rĭm mơmŏt, ngă bơngač brơi hơdôm čang rơmang hăng đăo gơnang nao tơlơi hơdip hiam klă mơng neh met wa djuai ania ƀiă kual giăm guai Đức Cơ, Gia Lai./.