Amăng tal nao čuă dêh čar Cuba, ơi Vương Đình Huệ amra hơmâo tơlơi đĭ pơhiăp ƀơi anăp anom bruă khua pơ ala mơnuih ƀôn sang dêh čar Cuba lơ 19/4, hrơi hơdor glăi tal blah dưi ƀơi Girón lơ 19/4/1961-lơ 19/4/2023 laih anun ăt jing hrơi khua mua pơ ala mơnuih ƀôn sang dêh čar Cuba tal X jơnum lok blung a tơdơi kơ plĕ hră ruah khua lơ 26/3 rơgao. Anai lĕ gru phun lăp hơdor pioh hăng yôm phara biă mă yua kơ tơlơi anai hơmâo lĕ, tơlơi ngă giăng mah rô nao rai plah wah Cuba hăng Việt Nam hiam phara biă mă.

Him lăng tal nao čuă dêh čar Cuba tal anai, khua mua pơ ala mơnuih ƀôn sang dua bơnah amra kĭ pơkôl lu hră ngă hrom akŏ pơjing bruă mă mơ̆ng sang bruă khua mua pơ ala mơnuih ƀôn sang dua bơnah, ngă hrom krăo lăng ngă tui hơdôm hră pơkôl pơkă, mơ̆ng anun pơtrut bruă ngă pŭ ƀăn dua bơnah Việt Nam hăng Cuba jai hrơi pơđĭ kyar hăng tŭ yua.