VOV4.Jarai - Mơmot tom brơi lơ 6/9, ƀơi Anom pơtui jua pơhiăp Dêh čar mrô 58 Quán Sứ, Hà Nội pơphun ngă Lơphet ƀơk pri Jua pơhiăp dêh čar Việt Nam thun 2022. Anai lĕ bruă mă hơdor glăi 77 thun hrơi pơdŏng Gong phun jua pơhiăp dêh čar Việt Nam (7/9/1945 – 7/9/2022). Pok phun mông ngă Lơphet ƀơk pri Jua pơhiăp dêh čar Việt Nam, Khua phun akha Gong phun jua pơhiăp dêh čar Việt Nam ơi Đỗ Tiến Sỹ pơsit rơgao rim tal pơđĭ kyar mơng lŏn ia, Jua pơhiăp Việt Nam dô̆ giăm na nao hăng rim mơnuih ƀôn sang, pơđao hăng đăo gơnang.

Jai amăng mông tơnap tap, huĭ rơhyư̆t, jai pơdah pran gơgrong, bruă gơgrong mơng mơnuih pôr pơhing Gong phun jua pơhiăp dêh čar Việt Nam. Khua phun akha Gong phun jua pơhiăp dêh čar Việt Nam lăi rơđah: Amăng rơwang pơplih bruă măi mok, Gong phun jua pơhiăp dêh čar Việt Nam jai khom kiăng pơplih phrâo ngă tui anô̆ gal mơng pô, khom hmâo hơdôm tơlơi pơčeh phrâo bruă mă ƀuh rơđah jing glông pôr pơhing tañ, hmao tlôn, ƀu hmâo guai gah. Tơdơi kơ 1 thun pơphun hăng čom mă pri, Grŭp pơphun bruă hmâo ruah mă laih ƀơk pri Jua pơhiăp dêh čar Việt Nam thun 2022 hmâo 5 pri A, 9 pri B hăng 11 pri C kơ 4 mơta pơanăn čom mă pri. Amăng anun hơdôm tơlơi čih “Hơdơ̆ hor phă dlai tlô lŏn ia pơkra jơlan Trường Sơn Đông” mơng Ƀirô gŏng phun jua pơhiăp kual Dăp Kơdư ăt dưi hmâo mă pri A mơn kơ tơlơi čih pioh kơ jua pơhiăp.

Siu H’ Prăk: Pơblang