Ba ƀing gơmơi nao čuă lăng anih blah ngă 50 thun hlâo adih, tơhan hơđăp Đinh Nhiêu dŏ ƀơi să Ia Yeng, tơring glông Phú Thiện, ăt hơdor na nao hrơi blah ƀơi Jơlan 7. Lơ̆m anun, ñu ngă Khua tơhan Trung đội 2, C1, H11 gah Khul tơhan tơring čar Gia Lai – Kon Tum. Ơi Đinh Nhiêu ră ruai: tơdơi kơ tơhan ta pơklaih rơngai Buôn Ma Thuột, rơbêh kơ 15 rơbâo čô ayăt hŭi bral đuăi mơ̆ng Kon Tum hăng Pleiku trun nao pơ jơlan 7. Khul tơhan anun đuăi prah prang sư̆ rơbư̆ ƀu thâo anŏ ngă lơ̆n tơhan ta kiăo blah:“Mông anun ƀing ayăt hơmâo sa khul tơhan mơtăm samơ̆ gơñu ƀu kjăp bruă blah ngă ôh, lơ̆m anun rơdêh sar, măi mok rơdêh tơhan nao rai ƀu hơmâo jơlan ôh, ƀu hơmâo pô git gai, lơ̆m anun phao kơtuang, rơdêh arăng pơklaih lui tơket tơkeng ƀơi jơlan. Mông anun, tơhan ta akă bơnal kô̆ ƀơi tơngan gah ieo, tơdah ƀu hơmâo akă bơnal kô̆ jing akŏn tơhan ta ôh”.

Ter jơlan 7, hơdôm anih hmư̆ hing kar hăng Sông Bờ, tơdrông Cây Sung, jơlan čư̆ kơčun čoe Tô Na…jing tơlơi hŭi bral biă mă hăng ƀing ayăt. Tơhan hơđăp Ksor Chư, lơ̆m anun ñu ngă tơhan Trung đoàn 48, Sư đoàn 320, Quân đoàn 3, ol kơdol lơ̆m hơdor glăi thun blah rơngai anun:“Lơ̆m hmư̆ tơlơi pơhing ječ ameč anun lĕ Quân đoàn 2 tơhan ngŭi ruk đuăi ƀơi jơlan 7, jing tơhan ƀing gơmơi pơgăn jum dar hlao, phao đuh đik đak. Lơ̆m anun amăng puih kơđông ayong Tạ Tấn, Khua apăn bruă kơđi čar iâu Chư mă rơdêh nao djru ană plơi, kâo ơ mơtăm yơh. hơdor glăi hrơi blah lơ̆m anun ngă kơ pran jua pơhưč pơhač biă, kâo pơư pơang yua dah kâo hơmâo ngă bruă klă hiam amăng tơlơi hơdip anai”.

Lơ̆m tơhan ta blah glăi kơtang kơtit, ƀing ayăt đuăi raih daih mut nao amăng glai. Lu anih, ƀing ayăt akă mă tơngan gơñu pô, rơbat nao pơ jơlan 7 wơ̆t hla kơ kô̆ rơkâo tơhan gah ta pap brơi. Amăng tơlơi lăp hơdor mơ̆ng Đại tá Nguyễn Vi Hợi, Tơhan sông kơtang blah ngă, tơhan hơđăp Trung đoàn 64, Sư đoàn 320, Quân đoàn 3, hơdôm hrơi blan 3 thun 1975 hăng bruă bơblah kơtang kơtit samơ̆ pơư pơ-ang biă:“Tơlơi blah ngă kơtang kơtit mơ̆ kâo gum blah anun lĕ lơ 17 hăng 18/3, dua hrơi anun pogăn tơhan Quân đoàn 2 mơ̆ng Việt Nam Cộng hoà ƀơi jơlan mrô 7. Lơ̆m anun, pơsit kjăp tơlơi pơmin lĕ pơklaih rơngai kual Dơnung pơlir hơbit lŏn ia jing sa. Lơ̆m blah ayăt ƀing gơmơi ƀu pơmin ôh kơ tơlơi djai rơngiă, hrơi ƀơi či djai lĕ djai yơh, mông ƀơi či ruă lĕ ruă yơh, lêng kơ gum hrŏm blah ayăt”.

Blah rơngai jơlan 7 djru prong biă amăng bruă blah rơngai kual Dap Kơdư, pok jơlan brơi tơhan hăng mơnuih ƀôn sang ta pơphun Tơgŭ blah bơyan bơnga thun 1975, pơklaih rơngai kual Dơnung, pơlir lŏn ia jing sa. 50 thun rơgao laih, jơlan 7 – jơlan ƀuh tơlơi bơblah hing ang đưm hlâo, ră anai jing jơlan prong 25, sa glông jơlan yôm pơtruh Gia Lai hăng hơdôm boh tơring čar kual Tong Krah. Ơi Rahlan Chung, Khua Jơnum min mơnuih ƀôn sang tơring čar Gia Lai, lăi nao kơ tơlơi đĭ kyar mơ̆ng tơring čar ƀơi lan anai:“Jơlan prong 25 – Jơlan 7 phrâo pơkra ming hiam laih, ră anai jơlan anai arăng nao pơ Phú Yên mơak biă. Ră anai amăng akŏ bruă prăp rơmet hăng jơlan đĭ kyar pơ anăp adih mơ̆ng hơdôm tơring glông ƀơi tơring čar găn nao jơlan anai hơmâo Phú Thiện, Ayunpa, Krông Pa, jing khŏm kơnang kơ jơlan anai yơh. Kual anai hơmâo plơi prong tui rơnuk anai. Tơlơi hơdip mơak mơn, hơmâo lu mơnuih, đĭ kyar biă yơh pơhmu hăng hơdôm thun hlâo adih, neh met wa hok mơak, nao hrŏm hăng Ping gah, Kơnuk kơna či ngă tui tơlơi pơtrun mơ̆ng đĭ kyar bơwih ƀong huă – mơnuih mơnam, pơđĭ tui tơlơi hơdip mơda”.

Kual lŏn pơđuai dơnung Cheo Reo ră anai phara laih. Ia iŏm mơtah mơda mơ̆ng phun pla boh troh hăng sang dŏ man pơkra prong, hiam, lŏm abih laih rơnuk blah ngă pơnah phao ting tang asăp kơdul lŏn adai, glăk pơplih jing kual bơwih ƀong đĭ kyar gah Ngŏ Dơnung Gia Lai./.