Amăng mông jơnum dưi lăng lĕ bruă hơkrŭ amăng dưm dăp, ngă rơbô̆t glông bruă kơđi čar mơ̆ng Việt Nam, Khua git gai Ping gah dêh čar ta ơi Tô Lâm nao pơhmư̆ mông ngă lơphet lăi pơthâo hơdôm tơlơi pơsit ƀơi ƀôn prong Hồ Chí Minh. Khua mir sir dêh čar ta ơi Lương Cường nao pơhmư̆ mông ngă Lơphet lăi pơthâo ƀơi plơi prong jưh jom Hà Nội. Khua git gai pơ ala mơnuih ƀôn sang dêh čar ơi Trần Thanh Mẫn nao pơhmư̆ mông ngă Lơphet lăi pơthâo ƀơi ƀôn prong Cần Thơ. Khua dêh čar ta ơi Phạm Minh Chính nao pơhmư̆ mông ngă lơphet lăi pơthâo ƀơi ƀôn prong Hải Phòng. Grŭp git gai Ping gah dêh čar ơi Trần Cẩm Tú nao pơhmư̆ mông ngă lơphet lăi pơthâo ƀơi ƀôn prong Đà Nẵng.

Amăng mông ngă lơphet, hơdôm bôh tơring čar, ƀôn prong hmâo lăi pơthâo laih hơdôm tơlơi pơsit kơ pơphun bruă gong gai 2 gưl, hăng lăi pơthâo Ping gah, gong gai phrâo pơjing.

Hơdôm mơta hră pơ-ar dưi lăi pơthâo hmâo: Tơlơi pơtrun pơsit mơ̆ng Khua pơ ala mơnuih ƀôn sang kơ bruă pơjing tơring čar, ƀôn prong; Tơlơi pơtrun pơsit mơ̆ng Jơnum min apăn bruă Khua pơ ala mơnuih ƀôn sang dêh čar kơ bruă pơjing hơdôm bôh să, phường, kual mă bruă phun gah tơring čar, ƀôn prong.

Hơdôm tơlơi pơsit mơ̆ng Ding jum kơđi čar kơ bruă pơdŏng Ping gah tơring čar, ƀôn prong; pơkă Grŭp mă bruă Ping gah, Grŭp apăn bruă Ping gah, Khua git gai Ping gah, Kơ-iăng Khua git gai Ping gah, Jơnum min pel ĕp kơđi tơlơi hơdôm bôh tơring čar gah Ping gah tơring čar, ƀôn prong.

Tơlơi pơtrun pơsit mơ̆ng Jơnum min apăn bruă Khua pơ ala mơnuih ƀôn sang kơ bruă ruah Khua, Kơ-iăng Khua Khul pơ ala mơnuih ƀôn sang; Khua hơdôm grŭp mơ̆ng Khul Khua pơ ala mơnuih ƀôn sang tơring čar, ƀôn prong; Khua Grŭp, Kơ-iăng Khua Grŭp khua pơ ala kơ Khua pơ ala mơnuih ƀôn sang dêh čar tơring čar, ƀôn prong.

Tơlơi pơsit mơ̆ng Khua dêh čar kơ ruah Khua, Kơ-iăng Khua Jơnum min mơnuih ƀôn sang hơdôm bôh tơring čar, ƀôn prong. Tơlơi pơsit mơ̆ng Jơnum min djop djuai ania mơnuih mơnam dêh čar Việt Nam pơjing Jơnum min djop djuai ania mơnuih mơnam dêh čar hơdôm bôh tơring čar, ƀôn prong.

Tơlơi pơsit kơ pơđut bruă mă hơdôm ping gah gưl tơring glông, gưl să hơđăp.

Tơlơi pơtrun pơsit mơ̆ng Jơnum min apăn bruă Khua pơ ala mơnuih ƀôn sang dêh čar kơ bruă pơjing hơdôm bôh să, phường, kual phun gah tơring čar, ƀôn prong.

Tơlơi pơsit mơ̆ng Grŭp mă bruă Ping gah tơring čar, ƀôn prong kơ pơjing Ping gah hơdôm bôh să, phường, kual phun; Hơdôm tơlơi pơsit kơ bruă ruah khua git gai Ping gah, Khul khua pơ ala mơnuih ƀôn sang, Jơnum min mơnuih ƀôn sang hơdôm bôh să, phường, kual phun.