Kiăng pơtong glăi boh tơhnal pok pơhai ngă tui hăng pơƀuh rơđah tum teč hloh djop hră pơtrun mơ̆ng Gơnong dlông ba yua amăng tơlơi hơdip mơda plơi pla, phrâo anai, anom bruă djuai ania gah sang bruă Khul pơ ala mơnuih ƀôn sang tơring čar Dak Lak hơmâo pơphun bruă hyu sem lăng bruă hơmâo ngă tui sit nik, pơphun čơkă tuai nao ngui dŏ glăi amăng plơi pla lơ̆m tơring čar. Grup hyu sem lăng, nao pơ mă bruă pơ ƀuôn Kli A, phường Ƀuôn Hô, ƀuôn Tuôr, să Hòa Phú, ƀuôn Tơ̆ng Jŭ, să Ea Kao hăng ƀuôn Akŏ Dhông, phường Ƀuôn Ma Thuôt. Giong hyu sem lăng brơi ƀuh, jơlan hơdră djru mơ̆ng tơring čar, hơmâo ngă gêh găl brơi mơnuih ƀôn sang, thâo pơphun bruă čơkă tuai nao ngui, dŏ glăi, hyu hmua hrŏm hăng dŏ ƀong huă hrŏm ană plơi pla, apah sem lăng hăng ngă tui gru grua đưm djop djuai ania amăng plơi. Kah hăng lăng bruă mơñam mrai, pơkra ming gơnam yua mă bruă, atông čing suang arap, ngui ngor ƀong mơñum, adoh suang gru đưm, pơjing rai lu mơta gơnam pơhưč ƀing tuai hor nao ngui dŏ glăi, apah prăk kơ ană plơi pla, mơ̆ng anun, pơjing bruă mă, ĕp prăk pơhrui glăi kơ sang anŏ mơnuih ƀôn sang amăng plơi pla hơđong. Anai lĕ kơnôl ƀuh rơđah bruă pơjing kông ngăn gru grua đưm djuai ania, jing anŏ pơtrut tơlơi bơwih ƀong huă pơđĭ kyar tui anăp ngă bruă mơ̆ Hră pơtrun mrô 80 hơmâo pơkă.

Khă hnun, kiăng kơ ngă djơ̆ tum etč hră pơtrun hăng djop tơlơi pơčrâo ba mơ̆ng Ding jum kơđi čar, brơi djă pioh, wai pơgang kông ngăn gru grua hiam đưm amăng rơnuk phrâo, djop plơi pla ăt rơkâo đĭ hăng tơring čar kiăng pok pơhai lu, prong hloh amăng jơlan hơdră djru ba. Boh yom phun lĕ djru djă pioh kông ngăn gru grua, pơtô hrăm hăng pơtrut bruă ngă hrŏm amăng kual. Ơ Y Kle Knŭl, Kơ-iăng khua anom bruă Gru grua să Hòa Phú rơkâo tui anai:

“Kiăng hơmâo dơ̆ng jơlan hơdră đing nao bruă djă pioh kông ngăn gru grua sang dlông đưm, bruă rơngaih, rowơi tơruai, mơñam mrai đưm, pok anih ngui ngor atông čing suang arap amăng plơi, anih ngui ngor ngă yang rơbang hăng akŏ pơjing gơnam sĭ mơdrô brơi tuai blơi djă glăi gru grua hiam. Kơtưn hơduah ĕp, pôr pơthâo, akŏ pơjing khul grup ba hyu tuôr tuai lu mơnuih pơtruh hăng djop plơi pla, ƀôn lan, anih tuai či hyu ngui amăng tơring čar, kiăng pok prong tui hăng pơđĭ boh tŭ yua ba hyu tuai dŏ glăi amăng plơi pla”.

Tui hăng Anom bruă Djuai ania gah Sang bruă khul pơ ala mơnuih ƀôn sang tơring čar Dak Lak lĕ, bruă pok pơhai ngă tui Hră pơtrun 80 kiăng mơnuih ƀôn sang yơh jing pô kơ bruă ngă hrŏm laih anun tŭ mă rơnoh sĭ mơdrô hơmâo mơ̆ng gru grua hiam gơñu pơjing rai. Hơdôm tơlơi čih pioh mơ̆ng bruă mă hơmâo sit ui anun lĕ atur yom pioh sem lăng, ngă tui tơlơi phiăn pơkă, bruă pơtrun djru mơnuih ƀôn sang pơđĭ kyar tơlơi hơdip mơda. Lăi pơtong kơ yak rơbat, bruă ngă tui hăng Hră pơtrun mơ̆ng Ping gah, ba yua sit nik amăng tơlơi hơdip mơda, yă Đỗ Thị Như Tình, Khua anom bruă djuai ania gah Khul pơ ala mơnuih ƀôn sang tơring čar Dak Lak brơi thâo:

“Grup hyu sem lăng hơmâo čih pioh tơlơi lăi pơthâo mơ̆ng bruă pok pơhai ngă tui hră pơtrun hăng lu jơlan hơdră kơnuk kơna djru amăng plơi pla. Kơnang kơ bruă ngă anun, amra kơsem min brơi pok pơhai ngă tui sa pok hră pơtrun phrâo pơđĭ kyar bruă tuai čuă ngui amăng plơi pla, lir hơbit hăng bruă djă pioh hăng pơđĭ tui gru grua hiam črăn phrâo či ba glăi boh tŭ yua lu hloh”.

Bruă pok pơhai tañ kơsem min, čih pơkra Hră pơtrun phrâo mơ̆ng Khul pơ ala mơnuih ƀôn sang tơring čar djơ̆ găl hăng tơlơi hơmâo sit nik, sa yak rơbat tong ten, rơđah rơđong, khut khăt, kiăng ba Hră pơtrun 80 mơ̆ng Ding jum kơđi čar mut tơma amăng tơlơi hơdip mơda, pơjing kông ngăn gru grua kual Dap Kơdư jing pran kơtang pơđĭ kyar bơwih ƀong huă mơnuih mơnam-pơtrut kơtang brơi Dak Lak đĭ kyar hloh pơ anăp anai.