Mơguah kơnôl 21/7, ƀơi Hà Nội, Jơnum min djop djuai ania mơnuih mơnam Việt Nam ƀôn prong Hà Nội pơphun bưp ƀô̆ mơta, hơdor tơngia tơhan hơđăp, tơhan rơka ba gru hăng ding kơna tơnap tap hloh ƀrô tal hơdor glăi 79 thun hrơi tơhan rơka-tơhan djai pơsăn drơi (27/7). Nao ngă lơphet hơmâo kơ-iăng Khua git gai Ping gah ƀôn prong Hà Nội Nguyễn Văn Phong hrŏm hăng ƀing amĭ Việt Nam sông kơtang hăng 130 čô tơhan hơđăp, tơhan rơka ba gru. Yua anai lĕ ƀon lan hơmâo mrô sang anŏ tui hơdră djru lu hloh đơ đam dêh čar hăng rơbêh 800 rơbâo čô, Hà Nội lêng lăng bruă “Hơdor tơngia” lĕ bruă jao akŏ phun hăng tơlơi glăm ba yôm biă mă.

Thun 2025, ƀôn prong hơmâo pơsur pơgôp amăng keh prăk “Hơdor tơngia” truh rơbêh 26 klai prăk, ƀơk hơdôm rơtuh rơbâo anung gơnam, man pơkra ming lu ring bruă pioh hơdor tơngia hăng djru pơkra ming sang dŏ brơi ƀing mơnuih tui hơdră djru. Ƀrô tal hơdor glăi thun anai, khua mua ƀôn prong tŏ tui pơphun nao čuă, tơña bla, ƀơk rơbêh 114.500 anung gơnam hăng abih tih rơbêh 273 klai prăk, pơdah pran hơdor tơngia hăng ƀing mơnuih djru hơkrŭ.