Kơ-iăng khua dêh čar jao kơ Jơnum min mơnuih ƀôn sang tơring čar Lai Châu prăp lui hlâo, ĕp lăng rơnoh prăk mơ̆ng ngăn drăp tơring čar, hơdai gum hrŏm pơ gơnong dlông pok pơhai tañ bruă djru ba ječ ameč, tañ truh pơ mơnuih ƀôn sang kiăng hơđong glăi tơlơi hơdip mơda laih anun rŭ glăi pưk sang đang hmua.

Laih dơ̆ng, Kơ-iăng khua dêh čar lăi pơtong tơlơi či kiăng wai lăng, mă yua rơnoh prăk pơhrua nao khom pơhaih rơđah rơđong, tơpă, djơ̆ tơlơi kiăng hăng djơ̆ mơnuih tŭ mă tơlơi djru; anăm lui hơmâo tơlơi ngă rơngiă hĭ soh sel, huač prăk đôč đač. Tơring čar hơmâo tơlơi glăm ba lăi pơthâo boh tơhnal ngă tui brơi djop ding jum anom bruă thâo hăng čih pioh pơƀut glăi, lăi pơthâo hăng Khua dêh čar.