Đĭ pơhiăp pơphun Jơnum gơnong glông lok 3 tal XIV, Khua git gai Ping gah, Khua mir sir ơi Tô Lâm lăi pơtong tơlơi rơkâo pơplih mơng dưm dăp anih anom hơdai nao hrưn đĭ klă amăng git gai wai lăng hăng klă tui bruă mă mơng Ping gah hăng anih anom kơđi čar.

Tui Khua git gai Ping gah, Khua mir sir-ngă hơbot anih anom kơnong lĕ tơlơi kiăng ngă, hơnong pơkă tuč rơnuč mơng bruă Ping gah git gai tŭ yua ƀiă, Kơnuk kơna wai lăng klă ƀiă, anih anom ngă bruă tañ ƀiă hăng mơnuih ƀôn sang djru brơi klă ƀiă. Boh tơhnal anai hơmâo tơlơi đing nao hăng bơtŭ ư hrŏm mơng abih bang mơnuih hăng ƀing kơhnâo kơhnăk. Kơ-iăng Khua ding jum wai lăng bruă mă hơđăp Nguyễn Tiến Dĩnh pơsit, Kar hăng Khua git gai Ping gah, Khua mir sir ơi Tô Lâm lăi pơtong, bruă dưm dăp anih anom amăng hrơi blan rơgao lĕ bruă yôm phun kiăng ngă hơbot anih anom kơđi čar, hơkrŭ glăi hơdôm bruă luk puk, pơhrŏ ƀiă hơdôm anom bruă gong jơlan. Samơ̆ ngă hơbot anih anom kơnong lĕ tơlơi kiăng; hơnong pơkă tuč rơnuč lĕ pơjing sa anih anom ngă bruă prong kơtang, mă bruă klă, tŭ yua, hrưn đĭ klă amăng wai lăng dêh čar hăng djru brơi mơnuih ƀôn sang jai hrơi klă ƀiă. Mơng anun kiăng ngă djơ̆ pran mơnuih ƀôn sang, lăng mơnuih ƀôn sang lĕ phun amăng djop mơta bruă, kah hăng tơlơi črâo trun, hơdră bruă mơng Ping gah, mơng Kơnuk kơna.

Tui hăng ơi Nguyễn Tiến Dĩnh, bruă dưm dăp anih anom pơlir hăng pok pơhai hơbô̆ bruă gong gai ƀon lan 2 gưl tơdơi kơ pok pơhai, ngă tui hơmâo ba glăi tơlơi pơplih prong, anih anom dưm dăp hơbot ƀiă pơhmu hăng hlâo adih. Amăng hrơi blan blung a mah bưp lu tơnap tap, gun găn-samơ̆ truh ră anai tơdơi kơ ha thun pok pơhai, anih anom kơđi čar ƀơi djop gưl dưi mă bruă hơđong, ngă bruă hruaih ƀiă, pơhlôm tơlơi rơkâo gong gai giăm mơnuih ƀôn sang. Bruă wai lăng kơnuk kơna, pơsir hĭ bruă mă mơng mơnuih ƀôn sang hăng anom bơwih ƀong sĭ mơdrô jai hrơi tañ ƀiă, tŭ yua ƀiă; hơđong tơlơi hơdip, rơnuk rơnua amăng mơnuih mơnam, tơlơi bơwih ƀong huă-mơnuih mơnam tŏ tui pơđĭ kyar. Mơng sem lăng tơlơi bơwih ƀong huă mơnuih mơnam amăng đơ đam dêh čar lêng kơ đi pơhmu tui tơđar-Anai lĕ hơdôm boh than blung a pơsit tong tơlơi črâo trun dưm dăp, ngă hơbot anih anom lĕ bruă lăp djơ̆.

Kiăng pơđĭ tui tơlơi kơtang git gai, wai lăng hăng pơgang boh tŭ yua bơwih brơi kơ mơnuih ƀôn sang, ơi Nguyễn Tiến Dĩnh lăi lĕ, kiăng pơtum ngă pơgiong tơlơi phiăn pơkă, bruă pơtrun amăng glông bruă kơnuk kơna, laih dơ̆ng pơđĭ tui tơlơi thâo kơ ƀing khua mua, mơnuih apăn bruă, biă mă ñu mơnuih ngă khua git gai wai lăng djop sang bruă kơnuk kơna gưl ngă bruă kơhnâo kơhnăk hloh. Hrŏm hăng anun, tơlơi thâo hruaih amăng bruă mă, ƀing khua mua apăn bruă khom hơmâo pran jua hiam hur har amăng bruă mă, tơlơi gơgrong ba laih anun tơlơi pơmin đing nao bơwih brơi kơ mơnuih ƀôn sang klă hloh. Ơi Nguyễn Tiến Dĩnh pơgôp hiăp: “Kiăng mơ̆ng gong gai kơnuk kơna dua gưl mă bruă klă hloh, ƀing ta khom ngă bruă thun blan pơ anăp, jŭ yap glăi abih bang hăng pơpha bruă mă, biă mă ñu pơpha tơlơi dưi amăng bruă mă tong ten hloh hăng djơ̆ găl, rơđah rơđong. Jŭ yap glăi sang bruă kơnuk kơna, boh nik ñu sang bruă bơwih brơi kơ mơnuih ƀôn sang, kiăng ngă djơ̆ bruă jao, hmao kru, yua anun khul mơnuih mă bruă, apah bruă khom ngă tong ten, kơjăp hloh mơ̆ng ră anai./.