VOV4.Jarai - Amăng rơwang hrơi tơjuh laih rơgao, Khul hlăk ai rơnuk Cộng sản Hồ Chí Minh pơphun lăng glăi hơdôm bruă amăng blan hlăk ai thun 2022. Hăng anăn pơphun “hlăk ai thâo pơčeh phrâo”, bruă mă amăng blan hlăk ai thun 2022 hơmâo djop gưl khul hlăk ai pok pơhai djop anih, pơhưč lu tơdăm dra, hlăk ai čơđai mut hrŏm. Lu hơdră, bruă mă pơplih, thâo pơčeh phrâo amăng pơphun hơdôm jơlan hơdră, bruă pok pơhai blan hlăk ai hơmâo lăi pơthâo, pok prong hmao tlôn, tŭ yua amăng djop khul amăng hơdôm rơwang hrơi tơjuh pok pơhai bruă mă.

Blan hlăk ai thun 2022 hăng anăn pơphun “hlăk ai thâo pơčeh phrâo” hơmâo 67/67 boh tơring car, khul grup hlăk ai mut hrŏm, pơhưč giăm 28.000 wŏt ƀing hlăk ai pok pơhai bruă mă hăng abih tih mrô prăk pơgôp giăm 68 klai prăk. Bruă git gai djop bruă amăng blan hlăk ai amăng thun 2022 hơmâo ngă tui hmao tlôn, na nao mơng gơnong glông truh pơ ƀon lan.

Hơdôm bruă mă hơmâo pok pơhai gêh gal hăng pran jua abih bang hlăk ai đơ đam dêh čar pơphun hơdôm bruă mă pioh hơdor glăi 91 thun akŏ pơjing Khul hlăk ai rơnuk Hồ Chí Minh, pơphun Jơnum Khul djop gưl anăp nao Jơnum khul hlăk ai đơ đam dêh čar tal XII; kiăo tui tơlơi git gai mơng Ping gah, Kơnuk kơna amăng pơgang klin Covid-19; hmao tlôn, hơdeč hmar kiăng kơ pơjing rai hơdôm hơdră pơčeh phrâo lơ̆m pơphun bruă mă, lăp djơ̆ hăng tơlơi sit nik amăng pơgang klin kheng.

Mông jơnum lăng glăi blan hlăk ai thun 2022

Lu hơdră, bruă mă pơplih, pơčeh phrâo amăng pơphun hơdôm jơlan hơdră, bruă mă pok pơhai amăng blan hlăk ai hơmâo lăi pơthâo, pok prong hmao tlôn, tŭ yua amăng khul hlăk ai amăng hơdôm rơwang hrơi tơjuh pok pơhai bruă mă. Hơmâo lu hlăk ai mut hrŏm ngă bruă amăng blan hlăk ai, hơmâo djop hlăk ai čơđai mut hrŏm.

Hrŏm hăng hơdôm boh than dưi ngă, sa dua bruă aka ƀu đing nao pok pơhai, aka ba glăi tŭ yua tui akŏ bruă amăng blan hlăk ai thun 2022, anun lĕ: bruă gum hrŏm črâo ba amăng pơphun bruă mă hăng ĕp brơi bruă mă mơng ƀing hlăk ai mơng djop gưl Khul hlăk ai aka ƀu klă, aka ƀu pơplih phrâo; aka ƀu hơmâo lu hơbô̆ bruă ba glăi tŭ yua amăng bruă djru pơplih mă yua boh thâo phrâo, mă yua boh thâo măi mok amăng ngă hmua; pok pơhai jơlan hơdră tơlơi thâo thăi mơng hlăk ai mut hrŏm pơplih bruă ngă hmua ăt aka ƀu klă; bruă akŏ pơjing, pok pơhai grup mă yua boh thâo sinh học amăng wai pơgang ayuh hyiăng rơhuông adai ăt aka ƀu ba glăi tŭ yua.

Amăng mông jơnum lăng glăi, lu tơlơi pơgôp hiăp mơng djop tơring čar, khul hlăk ai ba tơbiă hơdôm tơlơi rơkâo kiăng hrưn đĭ klă amăng bruă mă mơng hlăk ai pơ anăp anai. Thiếu tá Bạch Quốc Tuyên, Kơ-iăng Khua git gai khul hlăk ai Ding jum kông ang brơi thâo: Hăng bruă pơphun 5 gir run pơplih, pơđĭ kyar bơwih ƀong mơnuih mơnam, pơgang hơđong lŏn ia, kiăng gum hrŏm hơdôm bruă mă mơng djop tơring čar, ƀôn prong, ngă tŭ yua amăng bruă hlăk ai amăng wai pơgang guai lŏn ia:

“Hrŏm hăng bruă ƀing ta pơphun na nao blan 3 wai pơgang guai, ƀing ta kơsem min kiăng kơ dưi pơphun jơlan hơdră anai sui ƀiă dong. Pơhmutu, ruah thun lĕ pơsit thun hlăk ai Việt Nam hăng guai kual ia rơsĭ, bul pơtâo, ƀing ta kiăng pơƀut glăi lu ngăn rơnoh dong, hơmâo lu bruă mă dong kiăng kơ mut hrŏm pơđĭ kyar bơwih ƀong huă mơnuih mơnam kual giăm guai. Dua dong lĕ, ƀing ta rơkâo djop tơring čar, ƀôn prong tŏ tui gum hrŏm tŭ yua hăng khul grup hlăk ai Ding jum kông ang amăng bruă wai pơgang guai, bul pơtâo. Ƀing gơmơi čang rơmang amra hơmâo tơlơi pơphô bruă hăng Khul git gai khul hlăk ai gơnong glông hơmâo hơdră bruă gum hrŏm kơplah wah Khul hlăk ai Ding jum kông ang hơdôm tơring čar, ƀôn prong črâo ba bruă mă mơng Khul hlăk ai, kông ang hơdôm tơring čar, ƀôn prong kah hăng hơdôm tơlơi pơkă gum hrŏm, pơpha bruă amăng djop plơi pla ƀơi hơdôm tơring čar, ƀôn prong”.

Hlăk ai Dak Lak gir mut hrŏm amăng bruă djru brơi mơnuih mơnam

Đĭ pơhiăp amăng mông jơnum, ayong Nguyễn Anh Tuấn, Khua git gai mrô 1 Khul hlăk ai rơnuk Hồ Chí Minh lăng yôm hơdôm tơlơi gir run hăng ba tha dưi ngă mơng djop khul hlăk ai tơring čar, ƀôn prong amăng đơ đam dêh čar amăng blan hlăk ai, amăng anun hơmâo tơlơi tŭ yap mơng Ding jum, gơnong bruă gah gơnong glông, gong gai ƀon lan, abih bang mơnuih ƀon sang, pơsur pran pơplông đing nao bruă pơphun jơnum hlăk ai djop gưl; lu boh tơhnal tơnap amăng blan hlăk ai samơ̆ ăt dưi ngă soh. Samơ̆, lu mơta bruă aka ƀu klă, kiăng kơ lăng glăi hăng pơphô bruă, git gai wai lăng. Ayong Nguyễn Anh Tuấn brơi thâo:

“Tơlơi găn rơgao mơng ƀing gơmơi lơ̆m git gai blan hlăk ai lĕ tơlơi rô nao rai kơplah djop Ding jum, gơnong bruă kiăng kjăp. Ƀơi ƀon lan ăt hơmâo ngă tui klă, biă mă ñu amăng thun anai lĕ thun mă yua tơlơi phiăn hlăk ai. Blan hlăk ai hơmâo tơlơi pơlăi nao rai kơplah wah ƀing apăn akŏ gong gai hăng hlăk ai. Ƀing apăn bruă pơphô kơ bruă anai klă hloh hăng mơng anai amra hơmâo hơdră bruă, hơmâo tơlơi pơgôp amăng bruă mă kiăng Jơnum min jao bruă pơpha bruă brơi hlăk ai. Kâo čang rơmang anai lĕ tơlơi găn rơgao hăng ƀing gơmơi amra ngă klă dong pơ anăp, biă mă ñu amăng bruă prap lui jơnum pơ anăp anai”.

Siu Đoan: Pơblang