VOV4.Jarai - Ngui ngor blan bơrơmi ta juăt iâu Tê̆t trung thu jing hrơi pioh kơ ƀing čơđai ngui ngor, djă hyu apui kơđen dian rup pơtŭ, lăng arăng suang kơdăt ania čơgrai. Khă hnun, hăng ƀing čơđai pơ kual ataih yaih, kual mơnuih ƀon sang djuai ƀiă lĕ ƀañ trung thu ƀudah apui kơđen dian jing gơnam ƀu phiah hơmâo ôh. Hơdôm hrơi anai, lu anom bruă hyu iâu pơthưr mơnuih mơnam pơčrruh prăk kăk djru ba ƀing čơđai djuai ania ƀiă čơkă Tê̆t trung thu mơ-ak mơ-ai. Ƀơi să Pa Ủ, tơring glông Mường Tè, tơring čar Lai Châu, ƀing ơi ia jrao sang ia jrao Tơhan 354 (Gah Tổng cục Hậu cần), Jơnum min wai lăng Mrô ană mơnuih hăng čơđai muai Ding jum ling tơhan pơphun khăm, ƀơk ia jrao kơ 367 čô čơđai lĕ sang hră hrăm ƀơi Sang hră čem rông ană bă djuai ƀiă Pa Ủ. Amăng jơlan hơdră pơphun ngui ngor “Blan bơrơmi kơ ƀing čơđai thun 2022”, giăm 700 čô čơđai mơng să Pa Ủ hơmâo ngui ngor ƀong ƀañ kĕo, čơkă amai Hằng (dŏ hăng yang blan), čơkă met Cuội, laih anun hơmâo mă lu gơnam yua Anom pơphun ngui ngor ƀơk brơi hăng ƀing thâo čơmah djru brơi. Gơnam hăng prăk mơta hơmâo giăm 4 klai 500 klăk prăk.

Ƀơi guai dêh čar tơring čar Thừa Thiên Huế, hơdôm rơtuh čơđai sang hră gưl sa, gưl 2 Hồng Thuỷ, să A Lưới čơkă hrơi ngui ngor blan bơrơmi mơ-ak mơn. Hơdôm tơlơi djru mơng anom bruă, hơjăn pô pioh kơ čơđai pơ kual tơnap tap, kual mơnuih ƀon sang djuai ƀiă, plơi pla pơ guai dêh čar...hơmâo pơdah gru grua hiam “Pap kơ mơnuih kar hăng pap kơ drơi ta pô” mơng djuai ania ta.

Čơđai ƀơi plơi A Lưới, Thừa Thiên Huế ngui blan bơrơmi

Siu H’Mai: Pơblang