Hơdôm hrơi akŏ blan 4, ƀơi hơdôm anih dưm truă mrô 2 (XL02) amăng akŏ bruă črăn 2 jơlan rơdêh đuăi hmar Khánh Hòa-Buôn Ma Thuột, pran jua mă bruă man pơkra hơmâo pơphun ječ ameč. Ƀing kông ñơn, kỹ sư hrŏm hăng gơnam măi mok mơng kông ti pơčruih ngăn tuh pơ alin hăng man pơkra jơlan glông Phương Thành glăk ječ ameč tuh bêtông, glĭt pơtâo hăng tuh kơsu dua bơnah tơdrông. Ayong Đỗ Đình Huấn, pô mơgăt rơdêh guăi brơi thâo, lơm nua ia jâo đĭ kơtang, bruă mơgăt rơdêh hơmâo wai lăng kjăp, lăp djơ̆ ƀiă kiăng pơkrem prăk duh hăng pơhlôm djơ̆ hrơi mông man pơkra.

“Ƀing adơi ayong gơgrong pơkrem lơm mơgăt rơdêh, juă ga gap ƀrô, guăi đĭ trun brơi klă, anăm gự brơi kơtang đơi ôh. Lơm đuăi hyu kiăng đuăi rơnang ƀiă, pơhlôm brơi ga hơđong, anăm juă kơtang yua amra ngă tañ hrŏ ia jâo. Lơm dŏ tơguăn rơdêh rai pơgiăng, ƀudah lơm pơdơi yang hrơi dong ăt pơdjai hĭ măi kiăng pơkrem ia jâo”.

Tui ơi Lương Công Lý, Khua anom wai lăng anih čuk pơkra XL02, nua ia jâo đĭ kơtang hăng glăk kơƀah ngă kơ bruă mă yua măi mok đĭ biă mă, laih dong hrŏm hăng hơdôm pơsơi, simăng, čuah, pơtâo đĭ truh 20%. Ƀơi anăp kơ tơlơi anai, anom bruă hơmâo gơgrong amăng git gai wai lăng bruă mă yua ia apui diesel hăng wai lăng bruă man pơkra, kiăng pơhlôm brơi djop ia jâo yua hăng pơhlôm bruă man pơkra djơ̆ hrơi pơkă.

“Ia jâo hăng čuah pơtâo đĭ kơtang hăng kơƀah dong, ƀing gơmơi gơgrong ĕp anih blơi kiăng pơhlôm brơi bruă čuk pơkra. Laih dong, anom bruă ăt pel ĕp, ngă brơi hơbot hăng đing nao pok pơhai hơdôm anih man pơkra phun anun lĕ tuh base (bruă tuh kơsu), CTB hăng tuh kơsu ƀơi hơdôm ară jơlan phun.”

Pran jua čuk pơkra ječ ameč ăt glăk pơphun ƀơi hơdôm akŏ bruă čuk pơkra, dưm truă mrô 3 (XL03), amăng akŏ bruă man pơkra mrô 2 ară jơlan rơdêh đuăi hmar Khánh Hòa-Buôn Ma Thuột. Črăn čuk pơkra anai hơmâo abih tih nua ñu giăm 1.000 klai prăk, hơmâo 2 ară jơlan mur, tơdrôn hăng giăm 2,5 km jơlan. Ơi Trịnh Trung Lượng, Khua git gai akŏ bruă čuk pơkra XL03 brơi thâo, giăm ha blan rơgao, nua ia jâo đĭ kơtang, anih blơi mut ăt kơƀah ngă kơ anom bơwih ƀong sĭ mơdrô bưp lu tơnap tap. Mah tui anun, anom bruă ăt tŏ tui yua giăm 250 čô kông ñơn, kỹ sư hrŏm hăng 100 boh rơdêh, măi mok kiăng pơhlôm djơ̆ hrơi mông man pơkra.

Ră anai glăk amăng bơyan không phang, ayuh hyiăng gêh gal brơi kơ bruă man pơkra yua anun rĭm hrơi anom bruă giăm giăm 4.000 lit ia apui diesel kiăng tuh brơi măi mok. Yua anun, tui ơi Trịnh Trung Lượng, bruă pơhlôm brơi ia jâo yua hơđong glăk jing bruă mơ̆ anom bruă đing nao pơsir hĭ.

“Nua ia jâo đĭ kơtang laih dong kơƀah ia jâo blơi mă yua ngă kơ ƀing gơmơi khŏm prap lui klă hloh. Ƀing gơmơi hơmâo gơgrong mă bruă hăng hơdôm anom bruă sĭ ia jâo kiăng rơkâo blơi hlâo, blơi lu pioh mă yua. Ră anai ƀing gơmơi glăk pioh lui 3 kơthung pơprong mơng 15.000 truh 20.000 lit ia apui diesel hăng dưi mă yua mơng 1-1,5 blan.”

Čuk pơkra mơng blan 6/2023 hăng abih tih prăk tuh pơ alin giăm 22.000 klai prăk, jơlan rơdêh đuăi hmar Khánh Hòa-Buôn Ma Thuột čang rơmang amra pơtrut pơlir kual Dap kơdư hăng Dơnung tong krah. Lơm nua ia jâo đĭ kơtang, hơdôm anom bruă man pơkra hơmâo gơgrong pok pơhai lu hơdră lăp djơ̆ kiăng pơhlôm brơi bruă man pơkra djơ̆ tơlơi git gai mơng Khua dêh čar./.