Ƀơi tơdron rơdêh por Phù Cát, tơhan kông ang hơmâo dong dăp dua glông wai lăng kjăp, mơng gah rơngiao truh pơ amăng lăm tơdron rơdêh por. Bruă pel ĕp hlâo kơ por hơâo pơphun khut khăt, samơ̆ ăt ngă gêh gal, tañ hloh brơi kơ tuai. Tui tơlơi sit nik brơi ƀuh, lu tuai čuă ngui lăng yôm pran mă bruă kjăp phik, rơnuk rơnua hăng jê̆ giăm mơng anom bruă bơdjơ̆ nao. Amai Hoàng Thị Thùy, tuai čuă ngui mơng Hà Nội brơi thâo:

“Rai pơ tơdron rơdêh por Phù Cát, kâo ƀuh bruă wai lăng ƀơi anai kjăp biă mă, bruă ngă hră pơ-ar ăt tañ mơn. Tơdah dưi pơwot glăi dong hăng ruah anih čuă ngui, kâo amra pơwot glăi pơ Quy Nhơn sa wŏt dong.”

Tui anom bruă wai lăng bruă tơbiă hyu gah rơngiao hăng mut amăng dêh čar, kông ang tơring čar Gia Lai, kơnong amăng ha mơkrah blan rơgao, anom bruă bơdjơ̆ nao hơmâo pơhlôm rơnuk rơnua brơi giăm 300 wŏt rơdêh por, djru brơi giăm 50.000 čô tuai. Laih dong, rĭm hrơi pơčrang lăng hơdôm pluh tơ̆n gơnam tam hăng adung gơnam mơ-it ƀơi dua tơdron rơdêh por Pleiku hăng Phù Cát.

Thượng tá Ngô Lam Sơn, kơ-iăng khua anom bruă wai lăng bruă tơbiă hyu gah rơngiao hăng mut amăng dêh čar, kông ang tơring čar Gia Lai brơi thâo, anom bruă hơmâo hruă kjăp ngă tui khut khăt hơdôm tơlơi pơkă, laih dong gir run ngă gêh gal hloh brơi kơ tuai, pơgôp pơhưč lu tuai čuă ngui rai pơ tơring čar amăng thun tuai čuă ngui dêh čar.

“Khua mua anom bruă hơmâo jơnum hăng hruă kjăp bruă mă tơl ƀing apăn bruă ngă bruă gah rơngiao tơdron rơdêh por; đing nao ngă klă bruă pơtô pơblang, djru brơi tuai hăng ngă gêh gal hloh kiăng ƀing gơñu lơm rai pơ anai lêng kơ djôl amăng pran jua. Laih dong gum hrŏm hăng ACV Phù Cát pok pơhai hơmâo pano, jơlan hơdră…kiăng ngă hiưm pă tañ truh pơ tuai glăk rai pơ tơdron rơdêh pôr kiăng ƀing gơñu ƀuh, ƀing gơñu mut hrŏm ngă tui.”

Thun tuai čuă ngui dêh čar 2026, tơring čar Gia Lai ba tơbiă hơnong pơkă čơkă giăm 15 klăk tuai amăng lŏn ia hăng tač rơngiao. Hrŏm hăng bruă pơhlôm hơđong, rơnuk rơnua ƀơi hơdôm tơdron rơdêh por, Gia Lai ăt rơkâo hơdôm anom bruă rơdêh por kơtưn pok lu glông por nao pơ Pleiku hăng Phù Cát, djru brơi hơdôm jơnum ngui pơprong amăng thun anai./.