Pơhiăp amăng mông Jơnum, ơi Đỗ Văn Chiến – Khua Jơnum min djop djuai ania mơnuih mơnam dêh čar Việt Nam – čih djă pioh hăng bơni hơdôm bôh than mơ̆ Ping gah, gong gai hăng mơnuih ƀôn sang djop djuai ania tơring čar Gia Lai dưi ngă. Ñu tơpă lăi rơđah hơdôm tơlơi akă dưi ngă, akă ngă giong amăng pok pơhai Jơlan hơdră pơkă mơ̆ng lŏn ia pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng ƀơi tơring čar.

Hrŏm hăng anun, rơkâo Gia Lai lăng ba dong tơlơi hơdip mơda gơnam tam, pran jua mơ̆ng neh wa; ngă tui bruă yôm phăn mơ̆ng mơnuih hmâo arăng đăo kơnang amăng plơi pla ngă phun than lăi pơhing, pơsur neh wa djop djuai ania djru pơdŏng pơjing klă amăng pran jua mơnuih ƀôn sang kơjăp phik; Ƀu pơdơi hơkrŭ đĭ, kơtưn pran jua gum hrŏm hơbit abih bang djuai ania; kơtưn pơgang, ngă tui gru grua bôh thâo đưm djuai ania./.