Tơdơi kơ hmư̆ Khul khua apăn bruă ping gah amăng anom bruă Kơnuk kơna lăi pơthâo, pơgôp hiăp mơ̆ng djop sang bruă amăng kơnuk kơna, Ding jum kơđi čar, Khul git gai ping gah hơmâo pơčrong sai hăng tŭ ư: Hơdôm tơlơi lăi pơthâo, pơtong rơđah bruă bơwih ƀong huă mơnuih mơnam amăng dêh čar 6 blan akŏ thun tui hăng tơlơi lăi pơthâo mơ̆ng Khul apăn bruă ping gah anom bruă kơnuk kơna: Tơlơi bơwih ƀong huă amăng dêh čar ăt hơđong ƀiă, rơnoh prăk trun nua dưi wai lăng; bruă bơkơnar hơđong rơnoh prăk dong hnưh, hnưh kơnuk kơna, rơnoh prăk mă yua mơ̆ng kơnuk kơna dưi pơgang klă.

Ding jum kơđi čar tŭ ư hăng bruă mă, hơdră či pơsir amăng 6 blan rơnuč thun, laih dơ̆ng lăi pơtong sa, dua mơta bruă khŏm đing nao: Ăt khom ngă tui tŭ yua hơdôm hră pơtrun, hră klah čun mơ̆ng Gơnong dlông ping gah, Ding jum kơđi čar, khua mua pơ ala mơnuih ƀôn sang dêh čar, kơnuk kơna; tañ hăng ngă tui khut khăt sem lăng, jŭ yap glăi, ngă pơgiong tơlơi phiăn, jơlan hơdră mơ̆ng kơnuk kơna dêh čar. Pơtrut pơpha bruă git gai wai lăng, pơpha rơnoh prăk mă bruă djơ̆ găl hăng kơtưn sem tui krăo lăng, jŭ yap na nao, dăp glăi bruă mă brơi hơbôt, tŭ yua, sit nik.