Jơnum anai pơtong glăi, 2 blan laih rơgao, abih bang amăng ping gah, mơnuih ƀôn sang, ling tơhan đơ đam dêh čar ta hơmâo gir run laih kiăng dưi ngă lu boh tơhnal yôm pơphăn amăng djop bruă; Pơđĭ kyar bơwih ƀong huă mơnuih mơnam, pơgang lŏn ia, tơlơi rơnuk rơnua, pơtom hiăp, akŏ pơdong ping gah hăng glông bruă kơđi čar, bruă mă pơđĭ mơnuih ngă khua hăng pơhlôm, pơgăn ƀong kông ngăn, soh sat.

Hơdôm bruă mă phun pơ anăp, Khua git gai ping gah ơi Nguyễn Phú Trọng lăi, hrŏm hăng hơdôm anŏ gêh găl hăng mông djơ̆ lăp, ƀing ta hlăk ngă hăng amra bưp ƀơi anăp dŏ lu tơlơi tơnap tap, lông lăng yua kơ tơlơi pơhing ƀơi rŏng lŏn tơnah ăt hlăk rung răng tơnap, aka ƀu dưi thâo hlâo ôh, rơnoh pơhno kơtang tui plah wah hơdôm dêh čar pơprong pơdrong sah, tơlơi blah wang jai lu; anŏ pơblih ayuh hyiăng lŏn tơnah, tơlơi truh lŏn adai ngă, klin kheng dju djuăm duăm ruă bơbeč kơtang, yua kơ anun, djop gưl, anom bruă khom kơtưn hloh pran jua mă bruă, thâo gum pơgôp nao rai tơdruă, tŭ ư sa pran jua; hơdai gum hrŏm djơ̆ rơ-ua, git gai pơčrâo ba bruă ngă kiăng hơmâo boh tŭ yua. Pơtum nao kơ bruă prăp rơmet klă hloh jơnum ruah khua ping gah djop gưl anăp nao ruah khua ping gah dêh čar tal XIV pioh pơdah đĭ amăng mông jơnum khua mua apăn bruă ping gah đơ đam dêh čar lok 10 tui hăng akŏ bruă dăp laih hlâo, jŭ yap glăi, pơhrua nao dơ̆ng akŏ bruă, čih anăn ruah mơnuih či apăn bruă ngă khua, pioh prăp lui kơčăo bruă dăp đĭ hlâo, ruah mơnuih apăn bruă ping gah ƀơi djop gưl.