VOV4.Jarai-Tlam lơ 25/8, ƀơi sang bruă ping gah dêh čar, ơi Nguyễn Phú Trọng, Khua git gai ping gah Cộng sản Việt Nam hơmâo pơhiăp telephôn pơčrông sai hăng Khua mir sir dêh čar Indonesia, ơi Joko Widodo. Ơi Nguyễn Phú Trọng bơni hơ-ơč kơ Khua mir sir hơdôm boh tơhnal prong, lu mơta mơ̆ dêh čar Indonesia dưi ngă, amăng anun bruă pơhlôm pơgang klin Covid 19, rŭ glăi bơwih ƀong huă, hơdôm bruă mă pơtom hiăp hiam klă mơ̆ng dêh čar Indonesia hăng hơdôm tơlơi gir run amăng bruă ngă glăm ba ngă Khua khul G20 thun 2022.

Jơnum bơkơtuai nao rai pơhiăp telephôn dua bơnah khua prong mơ̆ng ơi Nguyễn Phú Trọng Khua git gai ping gah dêh čar

Lơ̆m dua boh dêh čar yak nao pơđĭ kyar phrâo, ơi Nguyễn Phú Trọng Khua git gai ping gah dêh čar ta lăi pơthâo hơdôm bruă mă prong pơ anăp adih, kiăng dua bơnah pơđĭ kyar kơtang hloh laih anun tŭ yua. Ơi Nguyễn Phú Trọng rơkâo dua bơnah pơtrut bruă bưp nao rai kiăng thâo hluh tơdruă, đăo kơnang amăng bruă kơđi čar, ngă tui djop hră pơkôl pơkă, pơđĭ tui ngă hrom tơlơi tơlơi phiăn bơwih ƀong huă, djru nao rai tong ten pơsir tơlơi amăng kual, jar kmar, amăng anun hơmâo tơlơi ƀơi ia rơsĭ Ngŏ laih anun ngă hrom amăng kual ASEAN ăt kah hăng lu tơlơi jơnum pơkŏn amăng jar kmar.

Nay Jek: Pơblang