VOV4.Jarai-Mơguah lơ 29/8, ƀơi anom bruă ping gah, Khua git gai ping gah, ơi Nguyễn Phú Trọng hơmâo mông bưp 80 čô khua pơ ala glăi jơnum prong ƀing pơ ala đơ đam dêh čar tal 11 gah Khul ia jrao kyâo bơrơkal mriah Việt Nam rơwang bruă thun 2022-2027. Hăng pô gơgrong ngă khua hing ang brơi kơ Khul ia jrao kyâo bơrơkal mriah Việt Nam tal X, khua git gai ping gah ơi Nguyễn Phú Trọng pơdah pran jua hok mơak dưi bưp ƀing khua mua pơ ala glăi jơnum, laih anun mơ-it hiăp kơ abih bang ƀing pơ ala nao jơnum hăng ƀing ngă bruă gah anom bruă ia jrao kyâo bơrơkal mriah hăng tơlơi khăp hiam klă hloh, tơlơi tơña bla tơpă, pơpŭ bơni hiam.

Mông jơnum bưp ƀô̆ mơta abih bang

Ơi Nguyễn Phú Trọng lăi pơtong, bruă ngă khăp pap, djru mơnuih mơnam lĕ sa gru grua hiam, yôm pơphăn mơ̆ng djuai ania ta, pơdah rai tơlơi khăp djru nao rai tơdruă mơnuih mơnam. Khua git gai ping gah ơi Nguyễn Phú Trọng rơkâo, rơwang bruă pơ anăp djop Khul amăng dêh čar ăt đing nao bruă akŏ pơjing hăng dăp bruă khua mua, mơnuih mă bruă amăng Khul; rĭm čô khua mua, mơnuih mă bruă gir run hloh, ngă bruă hăng tơlơi khăp pap, pioh pơtrut tui pơđĭ tơlơi glăm ba hăng kơnuih hiam mơ̆ng Khul jai hrơi hing ang.

Nay Jek: Pơblang