VOV4.Jarai-Tlam lơ 25/4, ƀơi anom bruă Ping gah dêh čar, Khua git gai ping gah ơi Nguyễn Phú Trọng hơmâo tŭ jum Khua anih jưh pơ ala dêh čar Mi, ơi Marc E.Knapper nao mă tơngan ƀrô pơphun rai mă bruă ƀơi Việt Nam. Khua anih jưh pơ ala ơi Marc Knapper bơni kơ ơi Nguyễn Phú Trọng Khua git gai ping gah dêh čar ta hơmâo pioh mông tŭ jum, pơdah pran jua hok mơak laih anun ư ang biă mă dưi glăi mă bruă ƀơi Việt Nam, ngă khua anih jưh pơ ala dêh čar Mi ƀơi Việt Nam. Ơi Marc Knapper lăi, dêh čar Mi dong yua Việt Nam sa boh lŏn ia rơngai hơjăn, pơdrong asah hăng pơtrut bruă ngă giăng mah pơpŭ nao rai tơlơi kiăng amăng bruă kơđi čar tơdruă.

Khua anih jưh pơ ala dêh čar Mi lăi amra pơgôp hrom amăng bruă pơđĭ kyar tơlơi rô nao rai kơplah wah Mi hăng Việt Nam. Khua git gai ping gah ơi Nguyễn Phú Trọng bơni hơ-ơč kơ Khua anih jưh pơ ala ơi Marc Knapper rai mă bruă rơwang bruă phrâo ƀơi Việt Nam; rơkâo kơ khua anih jưh pơ ala dêh čar Mi, ơi Marc Knapper ăt djru hrŏm klă hiam pơtrut tơlơi ngă giăng mah mơak dua bơnah hăng pioh lu bruă mă ngă hrom ba glăi boh tŭ yua amăng rơwang bruă dŏ mă bruă ƀơi Việt Nam.

Nay Jek: pơblang