VOV4.Jarai-Tlam lơ 18/7, Khua git gai ping gah ơi Nguyễn Phú Trọng hơmâo tŭ jum Grup khua mua Ping gah, kơnuk kơna dêh čar Lao, yua kơ ơi Bounthong Chitmany, ding kơna ding jum kơđi čar, Khua gum bruă ping gah, Kơ-iăng Khua mir sir dêh čar Lao ba jơlan hlâo rai čuă sit nik Việt Nam laih anun jơnum hrom hơdor glăi tal 60 thun hrơi akŏ pơjing bruă pơtom hiăp, 45 thun hrơi kĭ pơkôl ngă giăng mah hăng gơyut gơyâo kjăp Việt Nam-Lao.

Mông jơnum čơkă jum

Khua git gai ping gah ơi Nguyễn Phú Trọng hăng ơi Bounthong Chitmany pơdah pran jua hok mơak kơ boh tơhnal hiam klă bruă ngă hrom dua bơnah ping gah, kơnuk kơna thun blan rơgao; hăng lăi pơtong mah bưp tơlơi tơnap gleh glar pơpă hai, dua bơnah ăt amra gum pran jua, wai pơgang hăng pơbŭ đĭ kiăng bruă ngă hrom tong ten, tơpă ară Việt Nam-Lao; Lao-Việt Nam hơđong kjăp na nao, ba glăi boh tơhnal tŭ yua kơ mơnuih ƀôn sang dua bơnah.

Dua bơnah ăt ngă hrom kjăp amăng bruă pok pơhai ngă tui tŭ yua hơdôm pok hră pơkôl mơ̆ng khua mua pơprong dua bơnah ping gah, kơnuk kơna; kơtưn rô nao rai kah pơpha tơlơi thâo thăi, akŏ pơjing jơlan hơdră hăng pok pơhai ngă tui bruă man pơdong  hăng pơđĭ kyar lŏn ia.

Nay Jek: Pơblang