VOV4.Jarai-Mơguah lơ 2/3, ƀơi sang bruă kơnuk kơna, Khua dêh čar ơi Phạm Minh Chính git gai jơnum lăng nao rai amăng tivi kiăng pơtrut tañ pơkă hnong man pơdong hăng lăi pơthâo năp pơkă hnong man pơdong amăng dêh čar mơ̆ng thun 2021-2030, lăng nao pơ anăp adih truh thun  2050. Pơhiăp amăng mông jơnum, Khua dêh čar ơi Phạm Minh Chính lăi rơđah, tơdơi kơ 1 thun pơkjăp glăi bruă mă amăng kơnuk kơna phrâo, anai lĕ tal dua jơnum pơtrut bruă mă sem glăi hnong pơkă man pơdong tui hăng Tơlơi phiăn pơkă hnong man pơdong hlăk ngă tui ră anai.

Yap mơ̆ng mông jơnum hlâo truh ră anai, Kơnuk kơna hơmâo ngă lu bruă, samơ̆ anŏ hmar bruă mă, pơtong glăi hăng pơsit akŏ bruă kaih biă mă pơkă hăng anŏ kiăng. Tui hăng tơlơi jŭ yap, truh mông anai phrâo akŏ pơjing hĭ giăm 10% rơnoh pơkă hnong kiăng čih pơthâo tar ƀar amăng dêh čar. Khua dêh čar rơkâo pơtum pơtong glăi, pơčrông sai, pơgôp hiăp kơ Bruă mă pơkă hnong dêh čar mơ̆ngthun 2021-2030, lăng nao truh thun 2050. Ăt kiăo tui, sem glăi pơtong glăi anŏ gun kơƀah, anŏ aka găl, phun ñu mơ̆ng pơpă pơdjơ̆ nao kơ tơlơi phiăn, tơlơi pơtrun mơ̆n hă pioh kơ kơnuk kơna ƀư̆ pơkra glăi, pơhrua nao dơ̆ng.

Nay Jek: Pơblang