VOV4.Jarai-Mơguah lơ 11/5, Khua dêh čar ơi Phạm Minh Chính ba jơlan hlâo khua mua Kơnuk kơna Việt Nam nao truh laih pơ plơi prong jưh jom Washington dêh čar Mi, čuă jơmư sit nik hăng jơnum hrom khua mua  ASEAN-Mi. Him lăng jơnum yôm phara anai, khua mua djop dêh čar ASEAN hăng Khua mir sir dêh čar Mi amra lăng glăi hăng pơtong bruă mă abih bang bruă ngă hrom bơnah amăng 45 thun rơgao laih anun pơdah thâo bruă mă pơ anăp adih dơ̆ng, kiăng pơtrut ngă giăng mah ASEAN-Mi, laih dơ̆ng pioh lu mông pơčrông sai kơ tơlơi amăng kual hăng jar kmar mơ̆ dua bơnah bơđing nao.

Khua dêh čar ơi Phạm Minh Chính nao truh laih pơ Washington dêh čar Mi

Ăt amăng tal nao čuă jơmư anai mơ̆n, ơi Phạm Minh Chính Khua dêh čar amra hơmâo mông bưp hăng ƀing khua mua ding jum, anom bruă gah dêh čar Mi hăng  anom bruă jar kmar, ƀing ngă bruă sĭ mơdrô, mơnuih rơgơi kơhnâo dêh čar Mi; hyu čuă anih anom pơkra ming bơwih ƀong huă, gru grua hiam, sang hră ƀơi dêh čar Mi; jơnum pơphun ĕp bruă ngă hrom sĭ mơdrô, tuai čuă ngui hăng tuh pơ alin. Khua dêh čar pioh lu mông bưp nao rai hăng mơnuih ƀôn sang Việt Nam ƀơi dêh čar Mi.

Nay Jek: Pơblang