VOV4.Jarai-Tlam lơ 8/3, ơi Phạm Minh Chính Khua dêh čar hơmâo tŭ jum khul ngă bruă sĭ mơdrô mơ̆ng dêh čar Mi-ASEAN iâu klah čun ( USABC). Ƀơi mông tŭ jum, Khua dêh čar brơi thâo, Việt Nam lăng yôm hăng čang rơmang ăt ngă hrom kjăp hloh, pơđĭ kyar bruă rô nao rai kơplah wah Việt Nam-Mi đĭ tui yak phrâo laih anun ba glăi tŭ yua lu, amăng anun, ngă hrom bơwih ƀong huă-tuh pơ alin-sĭ mơdrô phun, pran kơtang pơtrut tơlơi ngă giăng mah dua bơnah.

Hơdôm  anom bruă sĭ mơdrô dêh čar Mi lăng yôm biă mă jơlan hơdră djru anom bruă sĭ mơdrô ngă hrom lơ̆m hrơi blan klin covid 19 ngă tơnap tap; pơdah pran jua bơni biă mă kơ boh tơhnal pơhlôm pơgang klin hăng mrô tlâ̆o pơgang lu ƀơi rŏng lŏn tơnah laih anun pơblih bruă mă djơ̆ găl, rơnuk rơnua, pơgăn klin tŭ yua mơ̆ng Việt Nam. Ƀing ngă bruă sĭ mơdrô mơ̆ng dêh čar Mi rơkâo, hăng lăi pơtong kiăng biă mă ngă hrom bơwih ƀong huă ƀơi Việt Nam, biă mă ñu amăng hơdôm bruă mă: pơkra apui lơtrik, pơhrŏ anŏ ngă sat bơtơbiă carbon; pơblih mă yua mrô, djru pơtrut tơlơi bơwih ƀong huă ƀơi Việt Nam đĭ tui mơ̆ng 21 klai dolar thun 2021 truh 57 klai dolar amăng thun 2025.

Nay Jek: Pơblang