VOV4.Jarai - Tom brơi (19/6), ơi Phan Đình Trạc – Ding kơna Ding jum kơđi čar, Ding kơna git gai bruă Ping gah dêh čar, Khua Grŭp Ping gah dêh čar hrom hăng Khua pơ ala mơnuih ƀôn sang tơring čar Lâm Đồng, hmâo bưp laih mơnuih ƀôn sang ƀơi să Đại Lào, plơi prong Bảo Lộc hăng să Liên Đầm, tơring glông Di Linh.

Ƀơi hơdôm anih bưp, mơnuih ƀôn sang pơdah pran jua mơ-ak kơ bôh tơhnal mơng tal jơnum lok 3, biă ñu Khua pơ ala mơnuih ƀôn sang hmâo pioh laih lu mông črông sai, hluai tui lu bôh yôm phăn. Hrom hăng anun, mơnuih ƀôn sang rơkâo kơ Grŭp Khua pơ ala mơnuih ƀôn sang tơring čar Lâm Đồng hơdôm tơlơi phrâo hmâo kiăng dưi lăng nao, pơsir. Pơ ala kơ Grŭp Khua pơ ala mơnuih ƀôn sang tơring čar Lâm Đồng, ơi Phan Đình Trạc – hmâo tŭ mă hơdôm tơlơi gum pơhiăp, rơkâo đĭ mơng mơnuih ƀôn sang hăng pơblang ƀơi anăp sa dua bôh yôm gah pô dưi. Kơnong kơ bruă pơgang pơgăn hưp ƀong kông ngăn, ơi Phan Đình Trạc pơsit amra “ƀu hmâo kual kom, ƀu hmâo jơlan pơkă pha ra” hăng amra ngă tui khut khăt hloh dong pơ̆ anăp anai./.

Siu H’ Prăk: Pơblang