Mơguah lơ 1/7, Jơnum min pơ ala mơnuih ƀôn sang tơring čar Gia Lai (phrâo) jơnum tal sa, rơwang bruă 2021-2026. Anai jing tal jơnum yôm biă gah kơđi čar, tơlơi phiăn hăng tơlơi hơmâo sit nik, pơsit tơlơi pơplih prong biă mă amăng hrơi mông akŏ pơdong tơring čar Gia Lai (phrâo), anăp nao đĭ kyar tañ, hơđong kjăp, hrưn đĭ amăng kual hăng dêh čar. Jơnum min pơ ala mơnuih ƀôn sang tơring čar Gia Lai phrâo tal 12 hơmâo 119 čô khua.

Ƀơi mông jơnum, Khua mua pơ ala mơnuih ƀôn sang tơring čar lăi pơthâo Tơlơi pơtrun mơ̆ng Jơnum min apăn bruă pơ ala mơnuih ƀôn sang dêh čar kơ bruă ruah khua mua amăng Jơnum min pơ ala mơnuih ƀôn sang tơring čar. Tui anun, ơi Rahlan Chung, Kơ-iăng khua apăn bruă Ping gah tơring čar hơmâo ruah ngă Khua jơnum min pơ ala mơnuih ƀôn sang tơring čar Gia Lai (phrâo) rơwang bruă 2021-2026; Ơi Trương Văn Đạt, dong kơna apăn bruă Ping gah tơring čar hăng yă Huỳnh Thuý Vân, ding kơna ping gah hơmâo ruah ngă Kơ-iăng khua jơnum min pơ ala mơnuih ƀôn sang tơring čar Gia Lai (phrâo). Jơnum min apăn bruă pơ ala mơnuih ƀôn sang dêh čar ruah yă Đinh Ly An ngă Khua wai lăng tơlơi phiăn; ơi Phạm Tấn Thành ngă Khua anom bruă bơwih ƀong - Prăk kăk; yă Huỳnh Ngọc Hà ngă Khua anom bruă gru grua - mơnuih mơnam mơ̆ng Jơnum min pơ ala mơnuih ƀôn sang tơring čar Gia Lai phrâo rơwang bruă 2021-2026.

Pơhiăp ƀơi mông đĭ apăn bruă, ơi Rahlan Chung, Khua Jơnum min pơ ala mơnuih ƀôn sang tơring čar Gia Lai phrâo brơi thâo hăng bruă ngă phrâo, ñu amra tŏ tui hơdôm boh tŭ yua mơ̆ng hơdôm rơwang bruă hlâo, ba abih tơlơi rơgơi mơbruă mơ̆ng ñu bơwih brơi mơnuih ƀôn sang, djơ̆ lăp hăng sa čô khua hơmâo mơnuih ƀôn sang ruah đĭ, ngă giong bruă hơmâo jao./.