Đĭ pơhiăp ƀơi mông jơnum, khua git gai ping gah ơi Tô Lâm čih pioh hơdôm tơlơi pơgôp hiăp tơpă sit, jĕ giăm, djơ̆ găl hăng bruă, lăng yom tơlơi pơgôp hiăp mơ̆ng ƀing khua mua nao jơnum hơmâo lăi kơ boh tơhnal tŭ yua hăng tơlơi rơkâo prong amăng bruă pơgăn tơlơi soh sat hưp ham ƀong kông ngăn, phăk phai amăng ping gah, kơnuk kơna ƀrư̆ hrơi ƀrư̆ pơblih klă tui.

Tơdơi kơ pơčrâo rơđah hơdôm tơlơi dŏ kơƀah, bruă aka ƀu dưi ngă, Khua git gai ping gah rơkâo pơ anăp adih, khom ngă tui tong ten ƀu dưi ngă amưng ôh, tŭ ư hăng boh tơhnal dưi ngă laih, kiăng pok pơhai khut khăt hloh, ngă kơtang tui, sơ̆n pran jua, ƀu hơmâo anih pơpă kom ôh hăng 3 mơta tơlơi či kiăng hăng 5 mơta bruă phun. Anun lĕ lăng kơ anŏ tŭ yua sit nik mơ̆ng dêh čar, djuai ania, anŏ tŭ yua kơ mơnuih ƀôn sang yơh hlâo hloh, djru kơ bruă akŏ pơdong ping gah hăng glông bruă kơđi čar rơgoh, kơjăp kơtang, tŭ yua, mă bruă tơpă hnơ̆ng, bơwih brơi kơ mơnuih ƀôn sang hăng pơtrut lŏn ia pơđĭ kyar. Dua lĕ khut khăt, ngă tui sơ̆n pran jua, na nao, pơsir djơ̆ lăp, hơmâo hơdră hiam klă mơ̆n, ƀu hơmâo kual kom ôh, ƀu hơmâo hlơi dưi lui hĭ gah rơngiao kơ tơlơi phat kơđi sit ngă soh glăi. Klâo lĕ khom pơblih mơ̆ng bruă pơhlom hlâo, anŏ phun pơđĭ tui tolơi gơgrong, tơlơi kơtang blah ngă amăng anom bruă ping gah, tơlơi krăp lăng mơ̆ng mơnuih ƀôn sang, ƀu lui tơlơi soh anet, pơkom hĭ lu tui jing tơlơi soh prong, ƀu lui hơmâo glăi tơlơi soh kah hăng hlâo kơ anun.