Tlam mơmŏt lơ 23/10, ƀơi sang bruă khua pơ ala mơnuih ƀôn sang dêh čar, ơi Trần Thanh Mẫn, Khua git gai pơ ala mơnuih ƀôn sang dêh čar git gai jơnum ngă yang čơkă Khua pơ ala mơnuih ƀôn sang gơnong yŭ dêh čar Malaysia. Giong ngă yang čơkă jum, dua bơnah pơphun bơkơtuai mơtam. Kiăng kơtưn kơ bruă giăng mah rô nao rai dua bơnah dêh čar, Khua git gai pơ ala mơnuih ƀôn sang dêh čar ơi Trần Thanh Mẫn rơkâo gah dêh čar Malaysia ăt pơtrut bruă pơblih nao rai phung khua mua pơprong hăng djop gưl, pok pơhai tŭ yua boh tơhnal, tơlơi pơkôl pơkă ngă hrŏm tui hăng ră anai, djru ngă kjăp tui tơlơi đăo kơnang amăng bruă mă ngă hrŏm dua bơnah lŏn ia.

Dua bơnah tañ pơđĭ tui rơnoh prăk sĭ mơdrô nao rai dua bơnah dưi hơmâo 18 klai đolar Mi tui hăng hơdră ngă bơkơnar tơdruă; ngă gêh găl kơ bruă sĭ mơdrô hăng tač rơngiao laih anun pơsir hĭ anŏ ngă gun kơ bruă sĭ mơdrô dua bơnah.