Ƀơi mông bưp hăng khua pơ ala mơnuih ƀôn sang dêh čar Kur, yă Khiôn Sudary, dua čô khua tŭ ư nao rai pơ anăp anai, ăt kiăng ngă kjăp tui tơlơi đăo kơnang bruă kơđi čar, pơtruh nao rai re se, čuă jơmư trư găn, bưp nao rai lu hloh djop jơlan pơtom hiăp; pơphun bưp na nao ƀing khua mua pơ ala mơnuih ƀôn sang dêh čar, kiăng pơčrong sai hrăm tơdruă tơlơi thâo thăi čih pơkra tơlơi phiăn dêh čar, bruă krăo lăng hăng pơsit hơdôm tơlơi yom kơ lŏn ia.

Ƀơi mông bưp khua pơ ala mơnuih ƀôn sang dêh čar Timor Leste, yă Maria Fernanda Lay, Khua git gai pơ ala mơnuih ƀôn sang dêh čar ta ơi Trần Thanh Mẫn rơkâo, dua bơnah tañ pơphun jơnum bưp nao rai blung a mơ̆ng Jơnum min tơlơi phiăn ngă hrŏm pơkă kơ bruă bơwih ƀong huă, boh thâo ia rơgơi Việt Nam-Timor Leste, pioh pơčrong sai kơ lu hơdră ngă rơđah hloh mă yua tŭ yua anŏ gêh găl mơ̆ng dua bơnah, kơnang kơ Hră pơkôl hơmâo kĭ hrŏm; pok pơhai tŭ yua hơdôm hră pơkôl amăng bruă pơtô pơjuăt, sĭ mơdrô braih, khua anih jưh pơ ala ƀơi ƀôn prong, bruă kơsem min ia rơgơi tơlơi kơhnâo, bruă tuai čuă ngui, hăng apui yua hơdjă.