Pơhiăp ƀơi mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, thun 2024, mah lŏn ia ta dŏ lu tơlơi tơnap, biă mă ñu bơbeč djơ̆ tal kơthel mrô 3 ngă răm ƀăm kơtang samơ̆ rơnoh pơđĭ kyar GDP ăt djop 7%, 15/15 tơhnal pơkă mơ̆ng khua mua pơ ala mơnuih ƀôn sang dêh čar dưi ngă djop, bruă wai lăng pơgang ba tơlơi hơdip mơda mơnuih ƀôn sang hơđong.

Amăng thun 2025 hơmâo lu tơhnal pơkă yom ƀơi lŏn ia lăp hơdor pioh, Khua git gai pơ ala mơnuih ƀôn sang dêh čar pơtrun hiăp kơ djop anom bruă gah sang bruă khua pơ ala mơnuih ƀôn sang dêh čar, ƀirô khua pơ ala mơnuih ƀôn sang dêh čar, djop anom gah Jơnum min apăn bruă phun pơ ala mơnuih ƀôn sang dêh čar ƀu pơmin čơđŏp đôč ôh hăng boh tơhnal dưi ngă samơ̆ kiăng gir run hloh pơsir tơlơi dŏ kơƀah, tơnap tap gun găn. Biă mă ñu, bruă ngă tui Hră pơtrun 18 mơ̆ng ping gah dêh čar kơ bruă dăp glăi, pơhrŏ mơnuih mă bruă hăng pơsit tong ten anom bruă kơnuk kơna kiăng hơbôt hloh, khom ngă tui khut khăt djơ̆ lăp.