Mơguah lơ 8/8, ƀơi Ƀirô Khua pơ ala mơnuih ƀôn sang dêh čar, grup krăo lăng kơ “Bruă ngă tui hơdră bruă, tơlơi phiăn amăng wai lăng sĭ mơdrô lŏn mơnai hăng pơđĭ kyar sang dŏ mơnuih mơnam mơng thun 2015 truh abih thun 2023” jơnum tal sa. Grup krăo lăng akŏ bruă yua Kơ-iăng Khua pơ ala mơnuih ƀôn sang dêh čar ơi Trần Thanh Mẫn ba jơlan hlâo, hrŏm hăng 3 kơ-iăng khua grup; 22 ding kơna hăng sa, dua čô khua mua, ƀing rơgơi kơhnâo hơmâo jak iâu. Hơnong pơkă krăo lăng lĕ sem lăng boh than dưi ngă, anŏ aka ƀu klă, tơlơi tơnap tap, gun găn, hơmâo tơlơi pơhrăm glăi, hơmâo hơdră kiăng hrưn đĭ tŭ yua amăng ngă tui hơdră bruă, tơlơi phiăn amăng wai lăng sĭ mơdrô lŏn mơnai hăng sang anŏ mơnuih mơnam.

Hăng bruă pơđĭ kyar sang dŏ mơnuih mơnam, krăo lăng đing nao jơlan hơdră, akŏ bruă, hơdôm hơdră pơđĭ kyar sang dŏ mơnuih mơnam; ƀing mơnuih, tơlơi gal tŭ mă hơdră djru sang dŏ. Đĭ pơhiăp amăng mông jơnum, Kơ-iăng Khua pơ ala mơnuih ƀôn sang dêh čar ơi Trần Thanh Mẫn lăi pơtong anai lĕ bruă krăo lăng prong mơng ƀirô Khua pơ ala mơnuih ƀon sang dêh čar, rơkâo ƀing ding kơna gir run pơčrông sai, pơgôp hiăp kiăng Akŏ bruă krăo lăng, tơlơi lăi pơthâo boh tơhnal krăo lăng hăng tơlơi pơtrun hăng boh than krăo lăng akŏ bruă ba glăi boh tŭ yua hloh.