Đĭ pơhiăp git gai jơnum, Khua git gai pơ ala mơnuih ƀôn sang dêh čar lăi pơtong, anai lĕ mông gêh găl kơ ƀing Khua, kơ-iăng khua pơ ala mơnuih ƀôn sang pơđing hmư̆, pơtong glăi bruă mă kơ anŏ tŭ yua, bruă prăp lui tui hăng akŏ bruă hơmâo čih pơkra dăp hlâo hăng hơdôm bruă hơmâo ječ ameč phrâo, sem lăng bruă pơpă kiăng ngă hlâo, bruă dưi ngă laih, anŏ aka ƀu dưi ngă; hơdôm tơlơi tơnap tap gun gan kiăng ruh pơsir hĭ; hơdôm anăp ngă bruă pơprong mơ̆ng djop jơnum min mơ̆ng ră anai truh abih rơwang bruă.

Tui hăng bruă ngă anun, Khua git gai pơ ala mơnuih ƀôn sang dêh čar ta ơi Trần Thanh Mẫn rơkâo djop jơnum min pơtum nao kơ bruă dưi ngă laih hăng boh tơhnal tŭ yua hloh mơ̆ng rim anom bruă, hơdôm bruă aka ƀu dưi ngă hăng tơlơi rơkâo đĭ pioh pơsir.