VOV4.Jarai-Tlam lơ 8/2, nao čuă, pơpŭ têt hăng mă bruă tom khua mua Ding jum Pơtô hăng Pơjuăt, Ding kơna ding jum kơđi čar, Kơ-iăng Khua git gai pơ ala mơnuih ƀôn sang dêh čar ơi Trần Thanh Mẫn pơtă pơtăn, pơ anăp anai gleng nao hloh bruă pơtô hrăm pran jua hiam, tơlơi dŏ dong ƀong huă, tơlơi rơgơi kơhnâo pơčeh phrâo, boh nik ñu pơtô tơlơi khăp kơ lŏn ia, pơ-ư ang kơ djuai ania, ….kiăng rŭ glăi tơlơi kiăng pơđĭ kyar lŏn ia pơdrong asah, hyuk hyak mơak klă.

Lăi nao kơ tơlơi dŏ kơƀah, amăng anun hơmâo dua mơta bruă khom pơblih phrâo lu hloh amăng bruă pơtô hăng pơjuăt amăng rơnuk hơmâo klin covid 19 ngă, ơi Trần Thanh Mẫn rơkâo, anom bruă pơtô hăng pơjuăt hơduah ĕp tong ten phun ñu tơlơi hơmâo, anŏ či hơmâo mă hơjăn, anŏ kơƀah mơ̆ng pô ta, laih anun khom hơmâo hơdră pơsir tañ ƀơi anăp hăng sui thun. Laih dơ̆ng, rơkâo Jơnum min gru grua boh thâo -Pơtô hăng pơjuăt ngă hrom Ding jum Pơtô hăng pơjuăt djru nao rai re se, mă bruă tŭ yua, hmao kru pơsir hĭ hơdôm tơlơi hơmâo amăng bruă mă sit nik; Kiăng ngă hrom kjăp hloh pơtô pơjuăt hăng bruă kơsem min, pok pơhai ba yua boh thâo ia rơgơi phrâo; ngă tui bruă pơtô hrăm tui anŏ kiăng mơnuih kơhnăk mă bruă amăng anih anom sĭ mơdrô pơsir bruă mă.

Nay Jek: Pơblang