VOV4.Jarai-Mơguah lơ 29/5, ƀơi tơring glông Bá Thước, tơring čar Thanh Hóa, jơnum pơphun bruă mă hlăk ai pơyơr pran jua amăng bơyan pơdơi prong thun 2022 yua kơ anom bruă hlăk ai tơdăm dra mut phung rơnuk Hồ Chí Minh pô pơphun. Bruă ngă mŏng ƀing hlăk ai pơyơr pran jua bơyan pơdơi prong thun 2022 pok pơhai lu bruă hăng hơmâo boh tŭ yua ƀơi 74 boh tơring glông ƀun rin hăng 26 boh tơring čar, 54 boh să tơnap tap hloh pơ kual treng hang ia rơsĭ hăng bul pơtâo ia rơsĭ ƀơi 12 boh tơring čar hăng 33 boh plơi hlăk ai akŏ pơjing bruă mă yua kơ anom bruă khua hlăk ai tơdăm dra mut phung dêh čar tuh pơ alin mơ̆ng thun 2001-2020.

Bruă ngă mơ̆ng hlăk ai bơyan pơdơi prong thun anai pơphun mơ̆ng lơ 1/6 truh lơ 31/8 hăng hơdră bruă lu anăp nao pơgang rơnuk rơnua hơđong kjăp laih anun bruă mă phun lĕ lăng nao anŏ kiăng sit nik amăng plơi pla, anom bruă. Pơhiăp ƀơi anih jơnum, Kơ-iăng Khua git gai pơ ala mơnuih ƀôn sang dêh čar ơi Trần Thanh Mẫn rơkâo: anom bruă hlăk ai ăt khom pơtong rơđah bruă ngă mơ̆ng hlăk ai pơyơr pran jua amăng bơyan pơdơi prong kah hăng sa bruă ngă ămng kơđi čar yôm kơ phung hlăk ai, mơ̆ng bruă ngă anun pơtô hrăm tơlơi pơmin bruă hơkrŭ, pran jua, tơlơi dŏ dong ƀong huă thâo thăi, hiam klă kơ hlăk ai tơdăm dra mut phung, pơtrut pơsur pran jua tơgŭ hơkrŭ, hur har pơyơr pran jua, drơi jăn kơ bruă čar, kơ bruă mơnuih mơnam yua tơlơi hing ang kơ lŏn ia.

Nay Jek: Pơblang