Khua git gai pơ ala mơnuih ƀôn sang dêh čar ơi Trần Thanh Mẫn lăng yom tơlơi djru hrŏm mơ̆ng Group Petronas hăng bruă pơhlom apui yua, ia jâo Việt Nam hăng tơlơi ngă giăng mah Việt Nam hăng Malaysia. Ñu lăi bruă ngă hrŏm dua bơnah sang bruă ia jâo hăng apui yua dŏ lu tơlơi gêh găl  lơ̆m lu dêh čar hlăk pơtrut kơtang pơblih ia jâo hăng apui yua pơkŏn.

Ơi Trần Thanh Mẫn, čang rơmang Petronas ăt pơtrut ngă hrŏm hăng Việt Nam, pơhlom hơđong ia jâo, apui yua sui thun; pok pơhư bruă ngă hrŏm apui yua hơdjă, mơtah mơda, apui yua mơ̆ng jua angin hăng jua ia; pok pơhai tŭ yua hơdôm kơčăo bruă ƀuăn ngă hrŏm, tui tơlơi phiăn dua bơnah dêh čar pơkă. Laih dơ̆ng, rơkâo kơ Petronas djru pơtô hrăm mơnuih mă bruă, jao glăi tơlơi thâo amăng bruă mă, biă mă ñu hơdôm kơčăo bruă apui lơtrik phrâo amra ba yua pioh sĭ mơdrô mơ̆ng thun 2025.