VOV4.Jarai - Ƀơi Sang mă bruă Khua pơ ala mơnuih ƀôn sang dêh čar ta, Kơ-iăng Khua git gai wai lăng pơ ala mơnuih ƀôn sang dêh čar ta, ơi Trần Thanh Mẫn hmâo tŭ jum laih Khua pơ ala mơng Khua mir sir dêh čar Mi kơ Pơplih ayuh hyiăng ơi John Kerry, glăk hmâo tal rai čuă, mă bruă ƀơi Việt Nam. Kơ-iăng Khua git gai wai lăng pơ ala mơnuih ƀôn sang dêh čar ta, ơi Trần Thanh Mẫn lăi rơđah: hăng sa amăng hơdôm bôh dêh čar bơbeč djơ̆ prong hloh yua kơ pơplih ayuh hyiăng, biă ñu ƀơi Kual lŏn dăo ia krông Cửu Long, yua anun yơh, Việt Nam pơsit bŏng glăi hăng pơplih ayuh hyiăng lĕ bruă mă phun, yôm phăn. Pơ̆ anăp anai, Khua pơ ala mơnuih ƀôn sang dêh čar Việt Nam amra gum hrom hăng Kơnuk kơna pơdŏng hăng ngă giong tơlơi phiăn kiăng pơtrut pơđĭ kyar hơdôm mơta apui yua pơkra glăi kah hăng apui pơkĕ hăng jua angin, hăng jua pơ-iă yang hrơi; Pơplih pơkra glăi hơdôm tơhnal pơkă mơng Bruă ngă mơtah pơlar đĭ; Čang rơmang Mi kơtưn djru Việt Nam gah prăk kak, hơdră phrâo, anom mă yua, pơtô pơhrăm mơnuih mă bruă hăng tơlơi găn rơgao pơplih apui yua kiăng Việt Nam dưi ngă tui djop hơdôm tơlơi pơkôl ƀơi COP26./.

Siu H’ Prăk: Pơblang