VOV4.Jarai - Mơguah lơ 22/6, ƀơi Hà Nội, Khul apăn bruă Ping gah dêh čar pơphun Jơnum hruă kjăp hăng pok pơhai ngă tui tơlơi pơtrun mrô 15 lơ 5/5/2022 mơng Ding jum kơđi čar kơ jơlan gah, bruă jao pơđĭ kyar plơi prong jưh jom Hà Nội truh thun 2030, anăp nao thun 2045. Đĭ pơhiăp git gai mông jơnum, ơi Võ Văn Thưởng pơsit tong, tơlơi pơtrun mrô 15 hơmâo lăi rơđah kơ tơlơi pơmĭn, hơnong pơkă, bruă jao, hơdră bruă phun kiăng pơđĭ kyar plơi prong jưh jom Hà Nội truh thun 2030, anăp nao thun 2045, hluai tui tơlơi pơgôp hiăp mơng Ding jum, gơnong bruă, gong gai amăng mông jơnum, ơi Võ Văn Thưởng rơkâo Ping gah, ƀôn prong Hà Nội kiăng pơphun brơi ƀing apăn bruă Ping gah hăng mơnuih ƀon sang kơsem min, hrăm tui, hruă kjăp ngă tui tơlơi pơtrun, pơtrut kơtang amăng bruă pôr pơhing, lăi pơthâo hăng djop mơta, mơng anun hrưn đi hăng thâo hluh rơđah tơlơi gơgrong phun tui tơlơi rơkâo amăng bruă pơđĭ kyar Hà Nội amăng hơdôm thun pơ anăp. Hrŏm hăng anun, ƀôn prong ăt kiăng jak iâu gum tơngan hrŏm, mă yua klă hloh hơdôm tơlơi dưi, tơlơi gal mơng plơi prong jưh jom hrŏm hrŏm hăng ngăn drăp kơnuk kơna hăng rơnoh prăk mơng jar kmar kiăng pơjing hăng pơđĭ kyar plơi prong jưh jom hiam klă jing anih akŏ phun kơ bruă kơđi čar, hăng lĕ hơtai boh kơ lŏn ia ta.

Siu Đoan: Pơblang