VOV4.Jarai - Mơguah lơ 19/1,ƀơi sang bruă Ping gah Dêh čar, Anom git gai bruă Ping gah jơnum klah čun Tơlơi pơtrun mrô 26 pơphun Jơnum abih bang pơgôp hiăp tơlơi lăi pơthâo glăi bruă ngă tui tơlơi pơtrun mrô 26 mơng Khua mua git gai bruă Ping gah tal 10 kơ bruă hmua, mơnuih ngă hmua, plơi pla. Ƀơi mông jơnum, ƀing khua tŭ ư hăng lăng yôm biă tơlơi lăi pơthâo glăi hơdôm tơlơi dưi ngă tơdơi kơ 13 thun ngă tui tơlơi pơtrun, jing bơdjơ̆ nao prong gah bruă hmua, plơi pla, mơnuih ngă hmua hăng truh kơ tơlơi bơwih ƀong - mơnuih mơnam. tui anun, rơnoh pơđĭ kyar bruă hmua hơmâo lu 2,94%. Prăk pơhrui mơng gơnam sĭ kơ čar rơngiao gơnam gah hmua, kyâo, akan hơdang đĭ 8,17%/thun. Jơlan hơdră dêh čar man pơdong plơi pla phrâo dưi ngă giong hlâo ha thun ha mơkrah. Mơng bruă jơnum, sa dua tơlơi pơgôp hiăp kual ngă hmua, mơnuih ngă hmua, plơi pla ta dŏ lu tơlơi aka ƀu klă, dŏ tơdu kah hăng rơnoh đĭ kyar bruă hmua kaih hĭ, aka ƀu hơđong. Bruă man pơdong plơi pla phrâo bưp lu tơlơi tơnap. Prăk pơhrui ƀơi plơi pla dŏ aset, pleh ploh aka ƀu dưm kơnar ôh kơplah wah kual anai, kual adih, plơi pla ƀon lan hăng plơi prong.

Siu H’Mai: Pơblang