Amăng tal nao čuă jơmư sit nik dêh čar Indonesia, tlam lơ 7/8, Khua git gai pơ ala mơnuih ƀôn sang dêh čar ta, ơi Vương Đình Huệ hơmâo bưp, mă tơngan hăng Khua mir sir dêh čar Indonesia, ơi Joko Widodo. Khua git gai pơ ala mơnuih ƀôn sang dêh čar ta ơi Vương Đình Huệ lăng yôm biă mă tơlơi ngă giăng mah pŭ ƀăn yôm pơphăn hăng Indonesia; lăi pơthâo hăng khua mir sir ơi Joko Widodo boh tơhnal čuă jơmư sit nik dêh čar Indonesia hăng jơnum hrŏm Khul khua mua AIPA-44, laih anun brơi thâo, dua bơnah anom bruă khua pơ ala mơnuih ƀôn sang dêh čar hơmâo kĭ hră ngă hrŏm pơtrut tui bruă ngă giăng mah dua bơnah sang bruă khua pơ ala, djru sit nik amăng bruă rô nao rai ngă pŭ ƀăn mơ̆ng dua bơnah, čang rơmang pơđĭ tui bruă ngă giăng mah pŭ ƀăn đĭ hloh amăng yak phrâo.

Khua mir sir dêh čar Indonesia tŭ ư hăng Khua pơ ala mơnuih ƀôn sang Việt Nam amăng bruă mă dua bơnah kơtưn djru nao rai bruă ngă hơmâo ră anai, kơtưn bruă ngă hrŏm amăng kual ia rơsĭ, mă akan hơdang hăng lu bruă mă phrâo ba yua mrô, pơblih yua ia săng hăng apui lơtrik pil rơgoh bơkơnar.