VOV4.Jarai-Mơguah lơ 9/2, Khua git gai pơ ala mơnuih ƀôn sang dêh čar ơi Vương Đình Huệ nao čuh ñang h’ŭ kơ ƀing mơnuih rơgơi kơhnâo hơmâo pran gum kơ lŏn ia đưm ƀơi pra yang Điện Kính Thiên, anih anom gru grua plơi pơtao đưm Hoàng Thành Thăng Long, plơi prong jưh jom Hà Nội. H’ŭ glăi ƀing mơbruă đưm hing ang ƀơi plơi rơngôl Hoàng Thành Thăng Long, ơi Vương Đình Huệ hrom hăng ƀing khua mua nao h’ŭ kup akŏ pơpŭ hơdor glăi kơ ƀing anong wa đưm đă mơnuih rơgơi kơhnâo hơmâo pran gum kơ lŏn ia, man pơdong, wai pơgang dêh čar hăng pơđĭ kyar; h’ŭ kiăng lŏn ia ta rơnang, sang anŏ ană plơi hơđong; kơtưn abih pran jua mă bruă djă pioh gru đưm akŏ pơdong lŏn ia, nua yôm gru grua djuai ania; pơtrut tơlơi ngă bruă anŏ kiăng pơđĭ kyar lŏn ia hing ang, hyuk hyak mơak klă, pơtrut tơlơi gum pơgôp djuai ania, pơblih phrâo dêh čar, lŏn ia ba yua măi mok phrâo pơđĭ kyar.

Ră ruai mơak klă hăng ƀing mă bruă, mơnuih wai lăng gru grua đưm plơi rơngôl pơtao Hoàng Thành Thăng Long, ơi Vương Đình Huệ, Khua git gai pơ ala mơnuih ƀôn sang dêh čar čang rơmang, ƀing khua mua, mơnuih mă bruă gir run hloh djă pioh gru grua đưm mơ̆ng plơi rơngôl pơtao đưm Hoàng Thành Thăng Long; hur har pơtô lăi djă pioh rơnoh yôm gru phun dêh čar, djru hrom man pơdong plơi prong jưh jom hăng lŏn ia lăp hăng pran jua tuh rơyuh mơ̆ng ƀing anong wa nao hlâo.

Nay Jek: Pơblang