VOV4.Jarai-Tlam lơ 20/7, ƀơi sang bruă pơ ala mơnuih ƀôn sang dêh čar, ơi Vương Đình Huệ Khua git gai pơ ala mơnuih ƀôn sang dêh čar tŭ jum khua ding kơna git gai ping gah, Kơ-iăng khua git gai pơ ala mơnuih ƀôn sang dêh čar Lao, ơi Sounthone Xayachak, Khua khul pơ ala mơnuih ƀôn sang ngă giăng mah Việt Nam-Lao hăng grup khua mua pơ ala mơnuih ƀôn sang dêh čar Lao rai čuă jơmư ƀơi Việt Nam. Ơi Vương Đình Huệ, Khua git gai pơ ala mơnuih ƀôn sang dêh čar ta lăng yôm biă mă tal čuă jơmư anai mơ̆ng khul khua mua pơ ala mơnuih ƀôn sang dêh čar Lao ƀrô hơdor glăi 60 thun dua bơnah ngă lơphet hơdor glăi akŏ pơjing bruă pơtom hiăp.

Ơi Vương Đình Huệ, lăng yôm tơlơi mă bruă, gir run pơblih phrâo mơ̆ng dêh čar Lao amăng thun blan rơgao. Ƀơi mông jơnum tŭ jum, ơi Vương Đình Huệ hăng ơi Kơ-iăng khua git gai pơ ala mơnuih ƀôn sang dêh čar Lao tŭ ư, pơ anăp anai, dua bơnah kơtưn hloh pơblih nao rai khua mua djop gưl čuă jơmư trư găn, djop gưl jơnum min amăng bruă pơ ala mơnuih ƀôn sang, khul ngă giăng mah, khul pơ ala mơnuih ƀôn sang djop tơring čar, boh nik ñu hơdôm tơring čar ngă adơi ayong, kiăng kah pơpha tơlơi thâo thăi tơdruă amăng bruă čih pơkra tơlơi phiăn, krăo lăng bruă mă amăng kơnuk kơna laih anun hơdôm bruă mă yôm kơ dêh čar.

Khua git gai pơ ala mơnuih ƀôn sang dêh čar ơi Vương Đình Huệ lăi pơtong, khua mua pơ ala mơnuih ƀôn sang dêh čar Việt Nam amra ngă abih pran jua pô pioh kơ dua bơnah sang bruă khua pơ ala mơnuih ƀôn sang dêh čar hrăm nao rai tơdruă tơlơi thâo thăi, laih dơng čang rơmang pơđĭ kyar bruă ngă pŭ ƀăn dua bơnah anom bruă pơ ala mơnuih ƀôn sang dêh čar djơ̆ hăng anŏ gêh găl phrâo, tơlơi ngă giăng mah yôm phara biă mă, jing anŏ ba gru tơlơi ngă hrom giăng mah dua bơnah anom bruă khua pơ ala mơnuih ƀôn sang dêh čar.

Nay Jek: Pơblang