VOV4.Jarai-Mơguah lơ 26/1, ƀơi Hà Nội, Khua git gai pơ ala mơnuih ƀôn sang dêh čar ơi Vương Đình Huệ nao čuă, mă bruă hăng pơpŭ thun phrâo tết kơ khua tơhan plơi prong jưh jom Hà Nội.

 Ơi Vương Đình Huệ lăi lĕ, hăng gru grua rơbêh 75 thun akŏ pơjing, blah ngă hăng prong đĭ, djă pioh gru grua plơi prong jưh jom rơbâo thun găn rơgao, ƀôn prong khin hơtai; hăng gru grua “Klă ƀiă pơsăn drơi, kiăng kơ dêh čar dưi hơdip”, ling tơhan blah ngă pơgang plơi prong jưh jom Hà Nội hơmâo pơsit tong ten, ngă tui tŭ yua jơlan hơdră ling tơhan, pơgang lŏn ia mơ̆ng Ping gah, tơlơi git gai mơ̆ng ping gah ling tơhan dêh čar, Ding jum ling tơhan hăng ping gah ƀôn prong Hà Nội amăng bruă akŏ pơdong tơdron blah amăng pran jua mơnuih ƀôn sang, tơdron blah hrom abih bang mơnuih ƀôn sang, lir hơbit hăng pơgang tơlơi rơnuk rơnua hơđong kơ mơnuih ƀôn sang, pơgang tơdron blah rơnuk kjăp mơ̆ng mơnuih ƀôn sang.

Thun 2022, Khua git gai pơ ala mơnuih ƀôn sang ơi Vương Đình Huệ, rơkâo ping gah, khua mua tơhan plơi prong jưh jom kiăng pơtum git gai, pơčrâo trun ngă tui klă tơlơi pơtrun mơ̆ng ping gah dêh čar tal XIII, kiăng jing ling tơhan phun kơsung nao pơ anăp, prăp lui blah ngă pơgang plơi prong jưh jom. Man pơdong djop sang bruă, anom bruă kjăp kơtang, ba gru hlâo.

Nay Jek: Pơblang