VOV4.Jarai-Mơguah tom brơi, ơi Vương Đình Huệ, Khua git gai pơ ala mơnuih ƀôn sang dêh čar ta nao jơnum pơhmư̆ pok jơnum lok pă khua mua pơ ala mơnuih ƀôn sang tơring čar Phú Thọ tal 19, rơwang bruă thun 2021-2026. Nao jơnum hăng pơhiăp git gai  ƀơi mông pok jơnum, ơi Vương Đình Huệ, Khua git gai pơ ala mơnuih ƀôn sang dêh čar ta čih pioh, lăng yôm hơdôm boh tơhnal tơring čar Phú Thọ dưi ngă amăng thun blan rơgao hăng lăi lĕ, amăng boh tơhnal dưi hơmâo hrom anun mơ̆ng tơring čar hơmâo tơlơi pơgôp pran jua prong biă mă mơ̆ng ƀing pơ ala mơnuih ƀôn sang tơring čar Phú Thọ.

Khua git gai pơ ala mơnuih ƀôn sang dêh čar ơi Vương Đình Huệ pơhmư̆ jơnum pok pơhai lok pă khua mua pơ ala mơnuih ƀôn sang

tơring čar Phú Thọ

Khua git gai pơ ala mơnuih ƀôn sang dêh čar rơkâo ping gah hăng gong gai kơnuk kơna tơring čar Phú Thọ kiăng pok pơhai tŭ yua Hră pơtrun jơnum ruah khua ping gah dêh čar tal 13, Hră pơtrun jơnum ping gah tơring čar tal 19 laih anun hơdôm hơdră mă bruă hơmâo pơsit tui tơlơi pơtrun mơ̆ng gơnong dlông, khua pơ ala mơnuih ƀôn sang dêh čar, kơnuk kơna. Djop jơlan hơdră pơtrun yôm, bruă pơsir ngă tui lăp rơngiao kơ tơlơi gêh găl, pơhno nao rai, hơmâo anŏ phara hơjăn mơ̆ng tơring čar treng čư̆ siăng, dŏ hơmâo tơlơi gêh găl lir hơbit amăng kual dơ̆ng. Gleng nao pơđĭ kyar bơwih ƀong huă ngă hrom sa amăng plĕ, pơđĭ kyar gru grua hiam hăng mơnuih mơnam ngă tui klă bruă pơgang anih hơdip jum dar.

Nay Jek: Pơblang