Ơi Vương Đình Huệ hăng ơi Seyed Kamal Sajjadi, pô tom ngă khua anih jưh pơ ala Iran ƀơi Việt Nam, jĕ giăm hăng Việt Nam laih ăt jing Khua akŏ pơjing Khul ngă giăng mah Iran –Việt Nam. Khua git gai pơ ala mơnuih ƀôn sang dêh čar ta pơsit, Việt Nam lăng yôm hăng čang rơmang pơtrut bruă ngă giăng mah pŭ ƀăn, ngă hrŏm lu mơta bruă hăng Iran.

Tal nao čuă jơmư mơ̆ng grup khua mua Việt Nam anai lĕ pơgôp hrŏm bruă kơtưn rô nao rai dua bơnah dêh čar kơnang kơ Ping gah, khua pơ ala mơnuih ƀôn sang, kơnuk kơna hăng djop tơring čar, boh nik ñu kơtưn bruă jĕ giăm mơnuih ƀôn sang dua bơnah. Khua pơ ala mơnuih ƀôn sang dêh čar ta čang rơmang Khul ngă giăng mah Iran-Việt Nam ăt pơtrut ngă tui lu hơdră, jơnum bưp nao rai jĕ giăm mơnuih ƀôn sang, pơtrut hloh dơ̆ng bruă ngă pŭ ƀăn hrŏm mơ̆ng dua bơnah kơñ pơgi ni anăp.