VOV4.Jarai-Tlam lơ 16/3, ƀơi sang bruă khua pơ ala mơnuih ƀôn sang dêh čar, ơi Vương Đình Huệ Khua git gai pơ ala mơnuih ƀôn sang dêh čar ta tŭ jum ơi Julius Maada Bio, Khua mir sir dêh čar Sierra Leone ƀrô tal rai čuă jơmư sit nik dêh čar Việt Nam mơ̆ng lơ 14-20/3. Ƀơi mông bưp, Khua git gai pơ ala mơnuih ƀôn sang dêh čar lăi, Việt Nam hơmâo jơlan hơdră mă bruă pok pơhư prong, pơtrut ngă hrom hăng khua mua pơ ala djop dêh čar, djop kual lŏn amăng hơdră ngă hrom dua bơnah, lu bơnah anom bruă pơ ala mơnuih ƀôn sang.

Hăng  djop dêh čar amăng kual Ơi jŭ, khua pơ ala mơnuih ƀôn sang dêh čar Việt Nam djă bong bruă ngă hrom bưp nao rai hăng djop dêh čar, pơtrut ngă hrom anom bruă khua pơ ala mơnuih ƀôn sang dêh čar, akŏ pơjing khul ngă giăng mah hăng lu anom bruă khua pơ ala mơnuih ƀôn sang kiăng pơtrut ngă hrom bơwih ƀong huă, sĭ mơdrô, tuh pơ alin, gru grua-pơtô pơjuăt dua bơnah. Lăi pơtong, khua pơ ala mơnuih ƀôn sang dêh čar Việt Nam hơmâo tơlơi gơgrong ba yôm git gai lŏn ia. Khua mir sir dêh čar Sierra Leone tŭ ư hăng khua git gai pơ ala mơnuih ƀôn sang Việt Nam ơi Vương Đình Huệ lăi, anom bruă khua pơ ala mơnuih ƀôn sang dêh čar jing sang bruă čih pơkra tơlơi phiăn kơtưn ngă hrom, kah pơpha, pơđĭ tui tơlơi rô nao rai dua bơnah.

Nay Jek: Pơblang